Ana為大肚婆學煮補身餸
好姐妹Ana R.、生意拍檔琦琦等均戥Lisa高興，煮得一手好餸的Ana揚言要學煮適合孕婦的餸菜給Lisa補身，Ana說：「佢好鍾意食我煮嘅嘢，依家佢大肚，要注意飲食，為咗BB更健康，我會開始學煮啲啱孕婦食嘅餸菜畀Lisa補身，佢今次懷孕真係好口密，唔好話Daniel，我都開心到跳起。（會否認BB做契媽？）暫時唔會，因為美國人好少搵朋友做契媽，通常會搵啲親戚做。」
而與Lisa一齊合資搞網站生意的琦琦開心說：「佢哋一直都想要BB，超級戥佢哋開心，生出嚟一定超級靚仔靚女。本來約咗Lisa喺美國返嚟食大閘蟹，依家大閘蟹宴要延遲一年。（會否減少Lisa工作量？）佢係工作狂，我幫佢做多啲冇問題，等佢老公叫佢唔好做咁多嘢。我會親自設計特別嘅首飾畀BB。」
而Jocelyn與老公Anthony出席活動時表示：「好戥佢哋開心，恭喜佢哋，（幾時到你？）未住，coming but not that soon。」Anthony則說：「要向吳彥祖請教，要開始諗吓生BB呢樣嘢，我哋都需要跟隨佢哋步伐，展開人生另一頁，要開工喇！」至於師妹Jessica C.表示可以做保母：「可以收好平，我好鍾意小朋友，我鍾意攬、錫、聞BB，但我唔想有BB，男友就唔鍾意BB喊。」
