Lisa S.佗 B 吳彥祖停工侍產

型男吳彥祖與名模太太Lisa S.結婚兩年半，一直恨生BB，Daniel更不諱言曾四出尋找生仔秘方，努力了兩年多，Daniel昨日接近凌晨時分，終於在微博公布Lisa懷孕的喜訊！他興奮表示：「給我的好朋友、影迷和各傳媒，我向大家公開宣布，我的美麗妻子Lisa，已懷孕和預產期是明年的6月。多謝大家一路以來的關心和祝福，我倆很興奮期待人生新的一頁。」換言之，Lisa已懷孕三個月，在微博的相片可見，Lisa坐在樓梯上甜笑，快將為人父的Daniel就在她背後開心到跳起。其後Lisa亦在社交網站上自行宣布懷孕，坦言非常期待人生的新一頁來臨。

留港分娩 6月生蛇B

Daniel昨日接受本報訪問時，仍難掩喜悅之情，他笑說：「終於可以鬆一口氣，因為夠三個月可以講嘛，Daddy媽咪一直都想我哋有BB，依家有咗，好興奮，真係好興奮！」提到BB性別，Daniel指要過多一個月才知道，但仔女都沒有所謂：「我之前講笑話想生仔，因為驚生女會畀人呃，其實仔女都係自己嘅，所以冇所謂。」他又透露太太將會留港生產，因為他上網查過，發現香港是全球最佳生BB地方的第六位，全亞洲來說，就排行第二位。

至於會否多陪伴太太？Daniel即自爆明年六月開始，就會停工一年，全職當好丈夫和好爸爸，據知Daniel現時片酬為六百多萬港元，但為了太太和BB，不惜推戲，他坦言：「在港拍埋林超賢新戲同《竊聽風雲3》，拍到6月，就唔會再接電影。（送咩畀太太？）喺外國太太生完BB，老公係要送禮物，所以我都諗緊送乜。」屆時亦會找陪月陪太太。至於Lisa，就不約而同表示鬆一口氣：「夠三個月可以講得，之前朋友話我肥咗，我又唔講得原因，好無辜。」

好胃口冇嘔 明日見人

而Lisa所屬的模特兒公司經理人就回應：「Lisa冇特別工作調動，佢又唔係artist，佢會keep住星期六喺電台開咪，活動都會照接，星期三仲會出席時裝活動。（佢有冇肥咗？）佢之前太瘦，依家係圓潤同飽滿咗，但唔肯定磅數。（有冇大肚婆反應？）見佢幾次都冇嘔，但食多咗嘢。（佢前男友Adrien Brody（《鋼琴戰曲》影帝）有冇恭賀佢？）你哋（記者）太多問題，星期三佢會一次過答。」

此外，時裝設計師張潔雯（Bonita）昨日為將於下星期舉辦的《世界時尚天橋2012香港》，進行模特兒面試及試身。她透露該活動將於尖沙咀海濱長廊進行，更獲得一眾名模好友支持，剛懷孕的Lisa當日亦將會參與行騷。對於Lisa懷孕一事，她笑言：「我知呀，我哋通咗電話。我應承一定會加強保安，等佢行得舒服同安心！真係好恭喜佢！」