葉玉卿焗接賀歲片

這邊廂陳慧琳生完小龍包復工拍戲博攞獎，那邊廂息影多年的葉玉卿亦技癢復出拍賀歲片。嫁到美國相夫教子的卿卿，相隔十六年被斟返港復出拍攝邵氏賀歲片《我愛HK2013恭喜發財》。身在美國的她接受電話訪問時說：「我只係口頭應承，仲未落實接拍，因為大女Victoria知道我要返香港咁耐就日喊夜喊，反而兩個細仔冇乜嘢。我叫佢哋（邵氏）唔好咁快講住，等我諗多幾日先，依家咪焗我接囉！」原來從影多年的卿卿未拍過賀歲喜劇，加上能夠同譚詠麟合作，才令她心動。提到好友吳君如早前游說她復出，但現跟對方打對台，卿卿笑言：「冇所謂啦，賀歲片各有各做。其實拍戲係其次，主要係我想返港探吓八十九歲媽媽，媽媽年紀大唔搭得飛機，我又忙少返香港，所以好想陪佢多啲。」