許亦妮：唔覺佢好呢味嘢

黃浩然︰「好突然，雖然我只見過佢兩次，傾唔夠十句，不過佢幾有禮貌，喺我印象入面佢係一個乖乖女。當然希望佢冇事，始終係同事。（近期多藝人吸毒？）唔覺得淨係呢排特別多，不嬲都有。（引誘你？）未試過，我身邊人都知我係咩人，引誘我都冇用。」

麥長青︰「嘩，拍戲咋？咁似拍戲啲劇情。（震驚？）我都呆一呆、醒一醒，雖然我同佢唔熟，不過覺得佢好開朗活潑。其實藝人係公眾人物，應該時刻都要警惕自己，我自己兒童節目出身，連煙都唔食，酒都少飲，以身作則。」

（左起）黃翠如、麥長青、黃浩然

佘詩曼

許亦妮︰「吓，有啲咁嘅事？我之前出騷都見過佢，唔覺得佢好『呢味嘢』，可能同佢認識唔深，不過喺我心中佢係一個好sweet、幾乖嘅女仔，我唔覺得係真，會唔會係個男仔食咋？希望係誤會。（聽聞圈中人吸毒？）實有，一定有人好『呢味嘢』，不過只係傳聞，唔知係咪真。」

黃翠如︰「唔係呀嘛？！我只見過佢一次，覺得佢好靚、好迷人，希望件事係誤會。（呢排有好多藝人吸毒嘅傳聞？）我成日覺得呢啲係傳聞，我自己連夜生活都冇，過嘅係阿婆生活。」

馬國明：「拍劇成日見，但私下冇聯絡，亦都冇見過佢接觸呢啲嘢，我覺得佢係傻更更，幾可愛嘅女仔，可能當中有誤會。」

黃智雯：「都幾驚訝！不過我唔太了解件事，唔係好方便去評論。（打畀佢？）呢段時間都唔想打擾佢啦！」

佘詩曼：「呢件事好難回應，都係交番畀警方處理好啲。（娛圈引誘多？）對我嚟講冇喎，我拍劇咁忙，又瘦成咁，再有人搞（引誘吸毒）會死O架。」