張慧雯兩劇被飛 星途玩完

娛樂圈最近充斥一股「毒品」味，繼日前徐淑敏丈夫黃浩有份投資的餐廳涉嫌有藝人「開餐」吸毒後，前日凌晨時分前華姐張慧雯（Candy）與男友涉及一宗貨車藏毒案，警方於車內搜出十二小包懷疑大麻花毒品，Candy當場被捕，雖然昨日已保釋候查，相信此事對其星途絕對有影響。

打入冷宮即時被飛

近年無綫愛力捧華姐如苟芸慧、岑麗香等，樣貌同樣標致的Candy於《On Call 36小時》內演晶晶一角甚為受落，人氣急升，有意安排她於明年開拍的《On Call 36小時2》內榮升第二女主角，與羅仲謙及岑麗香發展三角關係，力棒上位。惟Candy捲入涉藏毒案，無綫一方面戥她可惜，另方面亦認為她會前途盡毀，加上無綫向來注重形象，估計她會因此被打入冷宮。其有份參演的新劇《師父．明白了》雖然未入劇組，但高層樂易玲已鐵定易角，而新劇《On2》，Candy飾演醫生，該劇又是與醫管局合作，相信她最後亦會因形象問題被飛出局，看來今次她要付出沉重的代價！不過劇集監製陳耀全表示會等公司指示，未有考慮換人。擔心事件對劇集有負面影響？他說：「演出同個人係兩樣嘢，同埋佢又未開始拍，總之有進一步消息會公布！」而《On》劇監製潘嘉德因不在港，未肯發表評論。

岑麗香（右）與張慧雯是同屆華姐出身，後者卻捲入涉藏毒案。（資料圖片）

張慧雯（左）本被無綫力捧成為《On Call 36小時2》的第二女主角，如今已被飛。

張慧雯扣查一晚，至昨日離開警署，即向無綫高層樂易玲報告，樂易玲立即召她返電視城「照肺」，無綫製作資源部總監樂易玲昨晚表示已跟Candy見面詳談兩小時，其資深配音員父親亦陪伴在側，樂小姐說：「我知佢係無辜，依家係保釋候查。（新劇點算？）《師》劇會易角，因為要拍成一個月，咁中間佢要同警方配合調查，所以惟有停角色。（Candy心情點？）一盒紙巾畀佢用晒。（佢遇人不淑？）個司機係Candy朋友嘅朋友。（戥佢唔抵？）清者自清，交畀警方處理啦！佢會盡力接受調查。（點解停工？）雖然佢好乖又係基督徒，但都要做畀觀眾同公司睇，佢係一個用功演員嘛。」

張慧雯前日凌晨時分被扣押上警車接受調查。

樂易玲

香香：希望唔係真

與Candy是同屆華姐的香香，昨日聞得消息後「嘩」的一聲說：「我哋只係參選時認識，印象中佢好friendly同熱情。（佢有冇咩異樣？）唔知點答呢啲問題，傾偈都唔會傾到呢啲嘢啦！吸毒係唔好嘅事，唔希望係真啦。不過我就唔會掂呢啲嘢，亦唔會受人引誘，平日都係返工放工同返教會。（呢排好多藝人傳吸毒！）我都唔識聽又唔識睇報紙，唔知道。」Candy參選華姐時有份擔任評判的馬德鐘說：「係咪確實咗？真係好難去講呢啲嘢，大家係同事當然希望唔係真，雖然冇同佢合作過，但喺啲晚宴見過傾過偈。」對於近排傳出藝人吸毒，他說一直都有類似傳聞，以前他是警察，所以冇人引誘過他。

文：影視組