解構鍾卓萬與風騷三太太
劉松仁及江美儀在《名媛望族》中破格演繹多情大律師和風騷三太太，成功吸引觀眾，但二人坦言是次角色難度高，松哥更大爆開劇期間遇上挖角潮，面對人才流失，迫使他身兼幕前幕後工作。而美儀亦為求演出成功，自掏腰包學跳舞，為此劇付出良多。
現實中劉松仁絕少提及自己感情生活，只知他有位比他年輕廿載的空姐太太，偏偏松哥在無綫劇集《名媛望族》中飾演多情大律師鍾卓萬，戲內戲外反差這麼大，如何駕馭這風流角色？松哥說：「其實個角色除咗風流，仲係好複雜嘅人物，佢透過妻兒子女去重新認識自己，由霸權走向民主。」
鍾卓萬面對四位太太的愛都各有不同，敬愛元配、寵愛二太太、三太太的激情以及對四太太的愛恨交纏，松哥笑言角色的每一部分都是他本人：「我將自己性格放大，好似我都有暴躁的一面，就將佢放大，用喺角色身上。」
做埋幕後
松哥可有從戲中學到一招半式馭妻術？他迴避地說：「現實同演戲係互通，生活上嘅體驗可以幫你理解角色、豐富戲劇修養。」拍劇期間，無綫面臨電視圈挖角潮，一半的幕後人才被挖走，補上的新人又欠缺經驗，面對如此困境，松哥惟有身負重任，身兼編劇：「嗰時真係個『千載難逢』機會，咁啱遇到個有挑戰的角色，加上打緊仗，編、導、演都要同心合力先可以保得住套戲，大家一定要團結！」
演繹失控
從影數十年，松哥談到視帝獎項，認為現在是學習捨棄的時候：「獎項對我嚟講係個負擔，演戲同製作好壞先重要，獎都係留番畀後生。」反而入行多年演技早被肯定的美儀，認為獎項對她仍有一定意義，令她有期待：「獎會令你個profile靚啲，不過冇，我都會一樣努力工作。」
對演出三太太這個風情萬種的角色，美儀為角色平反說：「佢係個悲劇人物，嗰個年代畀人搞大個肚就惟有跟住個男人。佢由前段高處到後期跌，演繹時自己都好辛苦，真係會做到失控。」松哥在旁補充：「三太太不論性生活同愛情上都得唔到滿足，所以先越軌，佢其實係個怨婦。」為了演活此角，美儀事前準備工夫做足，自知跳舞是弱項，她約同松哥一起自掏腰包學跳舞，所以跳艷舞那場戲才會如此順利。