顏子菲習舞 恨跳江南Style
顏子菲早前為亞視台慶瞓身練舞，由於首日綵排跳足六粒鐘，跳到腿痛，但為了做好工作，她指再辛苦也是值得！而同事劉錫賢最近為亞視宣傳時大跳《江南Style》，顏子菲笑言有需要的話自己也想跳埋一份。
2008年亞姐亞軍顏子菲，外形亮麗纖瘦，雖然只習舞半年，但給人感覺好像已習舞一段很長的時間，對此，顏子菲笑言：「可能我身形似啦，其實我喺今年三、四月參加公司嘅《星級舞鬥》先開始學跳舞，點知一跳愛上，依家都有Keep住一個星期跳兩、三次，跳舞除咗可以Keep Fit之外，仲係好好嘅減壓方法，出身汗個人都精神啲。」
大腿抽筋
子菲日前為亞視55周年深圳站演出，反應不俗，而事前她經常回公司排舞作準備，雖然今次只是跳慢舞，但因裏面有不少高難度動作，加上第一次綵排便要跳足六個鐘，令子菲跳到雙腳痛，她表示：「第一日綵排完，大腿嘅筋即刻抽住痛，第二日仲痛得更厲害，但係為咗跳好隻舞，就算再辛苦都係值得嘅。」
狂睇MV
早前，亞視演員劉錫賢因外形有點像韓國Psy，故為亞視宣傳時，曾喘住氣大跳《江南Style》，還笑言要大玩惡搞版，如此爆趣，記者問顏子菲她會否也想跳埋一份？她笑言：「其實我睇咗《江南Style》嘅MV好多次，如果有用得着我嘅地方，當然義不容辭！」