吳日言美女廚神接筍job
藝人吳日言（Yan）早前獲邀為廚具拍廣告，短短兩日拍攝工作就穩袋6位數字酬勞，比她親手炮製撚手菜式更「和味」，她自爆接這個「筍job」背後有一驚險故事，當日跟商戶聯絡失誤，差點令她錯過這次賺大錢機會，笑言：「我覺得開始又行好運嘞。」
Yan早前曾推出過烹飪書，其「美女廚神」形象深入民心，最近得廚具品牌垂青邀她拍攝新一輯廚品廣告，由她任導師教授以最簡單的方式炮製各式菜餚：「我喺2日內整咗20道菜式，初時聽到要整燒味，覺得難度好高，但原來依家啲廚具好先進同多元化，一個煲唔止整到叉燒、燒肉，連甜品、麵包都整到，唔使再出街買，而且自己做又平又健康啲。」
自覺有運行
問她今次酬勞如何？她說滿意：「可以夠我交成年租金。」但她稱因這廣告由接洽、構思、拍攝及後期製作全是她一人包辦，故比僅幕前演出要付出多10倍的心血及努力，完成這份工作，她共花了近1個月時間。Yan希望類似的廣告工作陸續有來，自爆和廣告商曾因聯絡失誤，差點錯過這筆6位數字酬勞，她謂：「個廣告商只喺我facebook嘅粉絲區留言話搵我拍廣告，因為有太多粉絲留言，我冇留意到，但有日突然心血來潮想睇粉絲留言，我先知原來有job接，個廣告商足足等咗我兩個星期，我先聯絡到佢，真係好好彩，我開始又有運行。」
文：音樂組