黃榕純足200分 Naomi勝在勇敢

性感女星黃榕及Naomi相識十多年，共同經歷過不少風浪，亦曾鍾情同一男生，但至今仍情同姊妹！Naomi笑指黃榕外表火辣，其實是個單純的200分女友，黃榕則讚Naomi做事勇字當頭令她佩服。

黃榕及李思捷緋聞舊愛Naomi（馮鎵瀠）同樣行性感路線兼語出驚人，今年暑假又齊齊出寫真，看似是競爭對手，但其實老友鬼鬼，相識十多年曾共同經歷不少人生高低。Naomi認為要找一個如此有默契的好友實在不易：「我哋有好多回憶，好多嘢一講就明，細個時出街仲會夾着同一款衫，好似孖公仔咁！我18歲第一次穿臍環，都係佢畀錢我穿。」兩人當年因參加謝霆鋒fans clubs而認識，擇偶品味也的確相似，試過鍾情同一位男生，姊妹情因此冷卻了一段時間，黃榕回想往事亦覺得無謂：「當時係重色輕友咗，依家會重姊妹多啲。」不過她們笑言若再做情敵會公平競爭，但以不影響友情為大前提。

情傷難愈終身不嫁？

提到男人緣，兩女即互相吹捧，大讚對方較吸引異性，但她們均是情路坎坷，兜兜轉轉仍未有真命天子，Naomi大爆外表火辣的黃榕其實極易受騙，並讚她是200分女友：「佢好傻好易信人，會聽晒男友話，就晒對方，但有時蝕底嘅係自己，我都戥佢心痛，希望佢之後傻人有傻福啦！」黃榕則笑言Naomi個性主動，能輕易與異性打開話題：「佢同咩人都傾得一餐，好多男仔鍾意呢類型，而且我覺得佢好勇敢，想做咩都會盡力完成，好似之前毅然去台灣做自體脂肪隆胸，我就唔敢，所以好佩服佢。」問到覺得誰會先結婚？Naomi搶認想先做新娘：「我依家有個好靚仔嘅圈外男友，隨時嫁都唔定！」黃榕則直言受情傷太多，可能終身不嫁！