杜汶澤入圍當贏 推劉青雲稱帝
能夠令杜汶澤自豪的，不是擲下今年台灣金馬獎影帝寶座，而是他成為該盛會創立49年來，第一位同時入圍角逐「最佳男主角」及「最佳男配角」的演員。抱着「入圍當贏」心態，他竟大方到為對手鄭中基拉票，更推舉劉青雲勇奪影帝之銜，態度相當豁達。
金馬獎舉行前數天，阿澤仍身處杭州趕拍賀歲片，他接受電話訪問談勝算時顯得大智若愚。今次他憑《低俗喜劇》入圍角逐影帝，與強敵《大追捕》張家輝、《逆戰》謝霆鋒、《女朋友。男朋友》張孝全及《奪命金》劉青雲拗手瓜，又憑英皇電影《DIVA華麗之後》角逐「最佳男配角」，苦戰《白鹿原》吳剛、《女朋友。男朋友》張書豪、《候鳥來的季節》莊凱勛，與《低俗喜劇》鄭中基。以平常心面對的阿澤笑言「戰衣」亦沒時間添置：「屋企有套單吊西，正所謂去飲又靠佢，去送殯都係靠佢，攞番出嚟應吓急，最多喺機場買個煲呔配襯囉！」
虧欠鄭中基
但一提鄭中基，阿澤態度明顯認真：「當日佢接受咗個低到不能再低、兄弟到不能再兄弟嘅片酬，幫手拍《低》片，佢嗰幾個鏡頭根本就係全片精髓所在。自知虧欠咗佢好多，我無時無刻都想送樣嘢報答佢，可惜佢富甲一方家財萬貫。如果佢最終成為『最佳男配角』，我就即刻鬆咗口氣嘞。」
阿澤坦言歷史印證了喜劇與動作片，經常於頒獎禮上遭「扣分」。入行19年的他，論資歷始終不及青雲：「佢演技好不容置疑，論資排輩點都應該輪到佢嘞啩！好似嘉玲姐（劉嘉玲）一早就應該攞金像獎影后啦！所以年前佢憑《狄仁傑之通天帝國》獲獎，資歷都應該佔咗一定比例，亦印證點解當時咁多人想佢攞獎。」提到好友霆鋒，阿澤戥對方不值：「當年佢喺《十月圍城》嘅演出，早就應該有得攞啦！」
對於今次入圍名單，阿澤覺得最遺憾是《低》片導演彭浩翔未能入圍爭「最佳導演」。不過由於這部小成本製作獲得觀眾認同及超逾如期成績，姑勿論賽果如何，電影公司早已安排慶功宴，讓台前幕後狂歡一晚。
最佳劇情片
《消失的子彈》
《神探享特張》
《浮城謎事》
《奪命金》
《女朋友。男朋友》
最佳男主角
張家輝 《大追捕》
劉青雲 《奪命金》
張孝全 《女朋友。男朋友》
杜汶澤 《低俗喜劇》
謝霆鋒 《逆戰》
最佳男配角
杜汶澤 《DIVA華麗之後》
吳剛 《白鹿原》
張書豪 《女朋友。男朋友》
鄭中基 《低俗喜劇》
莊凱勛 《候鳥來的季節》
文﹕影視組