啟華女兒頭捱針：想打護士

對住個女我就開心，雖然都有打打鬧鬧，但感覺好似自己都變番個細路仔咁！外間覺得我似浪子，其實我一直想有個家庭，到依家照顧個女，就學識體諒。記得囡囡啱啱出世時，成個人都好黃，又發燒，睇醫生後個護士要喺我個女個頭上面拮針，一個人仔要受咁嘅對待，我真係想打個護士！

成功戒煙戒酒

人話養兒100歲，長憂99好啱，有次我去外地做嘢，囡囡送我機，喺機場喊到好淒涼，我真係心如刀割，三哥苗僑偉喺微博見到我嘅上載，佢同我講：「有排你心如刀割！」為咗個女，我都成功戒煙、戒酒，到依家已有十個月，所以肥咗少少，我都有做運動，但醫生話打Golf唔夠，我咪做GYM，點知做完食量仲大咗！

唔想個女成長咁悶，都有諗過追多個仔，生唔難呀……辛苦個老婆（石洋子）一年，但湊先最頭痛，就算我湊得幾咁耍家都冇用，我要搵食冇咁多時間，老婆又拍劇，依家由岳母湊，試過岳母感冒，自己湊番，搞到我成晚冇得瞓，好辛苦，所以再生都要諗邊個湊嘅問題，有同太太商量過，自己就「老餅」，但老婆30歲都未到，又唔急！過多兩、三年先啦，冇人搵我拍戲咪生囉！

囡囡有表演欲

香港好多「怪獸父母」催谷兒女，但我又唔係咁緊張喎……囡囡都係讀長春嗰邊啲幼稚園咋，到佢大啲都希望讀國際學校，因為太填鴨式教育會令到個小朋友好辛苦，囡囡冇運動我又唔鍾意，我想佢健康成長。

我發覺囡囡好有表演欲、好多表情，做演員呢……我就唔贊成，太辛苦嘞！成功率又低，呢行冇話包生仔，娛樂圈就好似金字塔咁，喺下面班人太多嘞！就算我個女有表演欲都唔代表佢成功，等佢大啲再算啦！（完）