李嘉欣再佗B 心大心細
已育有一子許建彤的大美人李嘉欣，近日傳出成功做體外養卵懷有第二胎，昨日嘉欣穿上貼身裙，現出小肚腩，對於是否再懷孕仍心大心細，嘉欣老公許晉亨（亨亨）一直對生第二名BB感到緊張，嘉欣昨再爆老公現在最擔心若養育兩小孩，會逼爆其逾7,000平方呎相連豪宅！
自從傳出再度懷孕的嘉欣，昨日首度現身公開活動，出席BOUCHERON全球第一最新形象店香港開幕禮，與品牌全球行政總裁PIERRE BOUISSOU先生及PPR亞太區總裁鄧婉穎一同剪綵。
着上藍色貼身長裙的嘉欣，不似傳聞中已懷有四個月身孕，不過在貼身裙下，嘉欣仍露小肚腩，腳上還踏着四吋高跟鞋，因此上落台階均要助手攙扶，她亦對穿高踭鞋感到好危險。
8月時嘉欣宣布封肚，惟封肚才不過三個多月，又傳出再度懷孕4個月，對於是否懷孕？嘉欣笑了兩聲：「我諗應該唔係，（係咪怕小器唔講得？）未知，唔可以講得畀你知，仲心大心細緊有定冇，（係咪好疑惑？）有時見囝囝大得好快，想重溫佢細個好得意嘅嘢，不過有時見佢好曳，殺咗我都唔想再生，順其自然。（亨亨要求生BB？）佢本身有少少驚，佢驚間屋已經好細，再有嘅話間屋逼爆。」現居7,000呎豪宅的嘉欣又話無本事換大屋，認真識講笑。
愛黐住囝囝
對於是否曾接受人工受孕，嘉欣否認，指第一次聽聞有關技術，她說：「等再年紀大啲，真係唔得先算。（現在不設防？）OK，唔使講到咁DETAILS。（肥咗？）我係肥咗，唔係孕味，係件衫效果。」她亦否認養肥自己為準備生BB。她說老爺奶奶沒有要求她再生BB，又爆亨亨對再做老竇很冷淡，只有她一個母性大發，又說亨亨鍾意仔講到出晒面，如果首胎是生女才會再追仔，但自己是喜歡女。
但嘉欣愈說愈亂，再問她近日少出席活動是否為養生？她說：「唔大肚，唔養生，都有出席大陸工作，下星期會去上海。自己好黐小朋友，其實囝囝唔太需要我，係我黐住囝囝，最享受同個仔一齊去學嘢，一齊玩樂器。」她又說連老公都投訴她只掛住兒子，嘉欣笑說亨亨在朋友的聚會中訴苦，自認好似隱形眼鏡，被嘉欣用完即棄。
文：名人組