任達華夠照 琦琦恨Psy撐場
任達華（Simon）與朋友合資在內地搞酒吧，請到剛做新郎哥的李璨琛擔任DJ打碟，加上Simon自己做生招牌，明星效應下，一開張已日日爆滿，太太琦琦揚言最希望可以請到近期至hit的韓國歌手Psy捧場，即場跳《江南Style》。
影帝任達華與友人合資逾七位數字在上海開新蒲點RICHY酒吧，日前舉行開幕酒會，除了太太琦琦外，好友惠英紅、李璨琛（Sam）亦有出席，場面熱鬧，當晚場內大播現時hit爆的《江南Style》，不少賓客即興奮起舞，將氣氛推至高峰，琦琦笑謂或因為玩得太過盡情，搞到返港後發高燒！
被問知否Psy將於月底來港，琦琦表示知，屆時還會與Simon去探班，琦琦說：「Psy韓國嗰邊經理人之前有聯絡過Simon，叫Simon去演唱會探佢哋，到時我同Simon入後台。（會否邀請Psy去上海新店玩？）到時會親自邀請佢，同佢講如果去上海一定要嚟我哋間酒吧玩吓，好希望佢可以即場跳《江南Style》，因為首歌實在太hit，無人唔識！」
李璨琛客串打碟
琦琦透露今次是Simon首度與好朋友們夾份做生意，主要是他有很多外國朋友到上海觀光或工作，希望有個地方可以招呼朋友，Simon於是下定決心創立這星級蒲點，琦琦說：「用咗六位數字裝修，個舖整得好靚，而且Sam一有時間就會喺度擔任客串ＤＪ打碟，因此開業後整個星期也『爆場』，冇位訂，店內的客人大都是時尚界型人，令這裏成了潮人新據點。（Simon事前有問你意見嗎？）有啊！我很支持他，畢竟終於有個地方能讓他可以親自招呼好友。」
文：名人組