周美欣死口唔認拖奀星

出道5年的周美欣，自2007年當選港姐季軍後，演藝事業雖未見突出，但感情生活卻相當甜蜜。早前她被拍得與無綫奀星謝卓言在中環行街兼睇戲，事後她曾例牌否認戀情。不過日前本報又再發現二人到銅鑼灣逛商場拍拖，今次主攻瑜伽用品，謝卓言不停幫周美欣揀瑜伽墊，連貼身的運動小背心都畀埋意見，兩人全程有商有量，但最終齋睇冇幫襯。

態度親暱摸頭

其後他們到附近購買乳酪雪糕，周美欣負責揀口味，及至等候期間，男方不避嫌搭住周美欣香肩，繼而又伸手輕摸她的頭頂，女方即露出冧樣相當受落。只見周美欣和謝卓言態度親暱地四目交投，兩人在店內打情罵俏一番後，捧着一杯雪糕離開，一杯雪糕兩份食，一人一啖溫馨得羨煞旁人。當他們轉身準備離開時，突然發現記者拍照，正將雪糕送入口的周美欣一臉尷尬。其後記者問到兩人是否拍拖？周美欣依然死口不認，她說：「唔係，佢係我識咗好多年嘅老朋友啫！」

大騷長腿的周美欣和謝卓言再次拍拖斷正。

謝卓言輕摸周美欣頭頂，態度親暱。

文、攝：追蹤組