美國樂壇天后瑪莉亞卡里（Mariah Carey）出名大花筒，尤其是用在孖B身上更是「一擲千金」。最近有小報就爆瑪莉亞每個月豪花4萬多港元來買名貴護膚霜為16個月大的仔女搽pat pat防尿疹！
身兼歌手及歌唱新秀節目《一夜成名》（American Idol）評判的瑪莉亞，最近被美國小報《Star》踢爆為防止仔女Monroe與Moroccan有尿疹，豪花約14,820港元買16安士裝的國際著名潤膚霜品牌用作搽子女的屁股，認真誇張！好友更指：「無嘢好得過做瑪莉亞仔女，單係每月花響屁股嘅潤膚霜，就高達約46,800港元！」
不過瑪莉亞就不會浪費，好友指她會將用剩的潤膚霜搽面，一舉兩得！不過相信瑪莉亞好少機會親自為一對「富貴B」搽潤膚霜，事關好老公Nick Cannon早前接受訪問時就爆自己為子女換尿片的次數多過老婆。他說：「我哋都有為子女換尿片，但唔知點解我硬係換得多過老婆。」而Nick更指自己唔驚為子女換尿片。
事實上，唔單止潤膚霜，瑪莉亞與Nick之前亦為仔女購買不少名牌BB鞋、意大利入口BB包被，更曾用名牌礦泉水為仔女沐浴。不過瑪莉亞及老公Nick Cannon收入豐厚，又使咩怕胡亂花錢。
文：外娛組