江若琳恐怖怪癖暖着二手底
每人心裏或多或少都藏有一些秘密，大秘密公開可能會牽連甚廣，小秘密則無傷大雅，多數離不開瘀事、怪癖，今次一班圈中藝人名人與大家分享她們的小秘密，自揭鮮為人知的一面。自言大頭蝦的江若琳自爆唔介意着別人除下暖笠笠的打底褲；而歌手糖妹公開怪癖，最鍾意幫細佬唧黑頭。
江若琳
「我好大懵，成日唔記得帶打底衫褲，好鍾意叫人除落嚟借畀我，身邊助手、工作人員都怕咗我，啱啱除低仲暖笠笠我都冇所謂。」
Rosemary
「有次揸車去到一條單向路，為咗唔想兜圈，我倒後開番出去！只係一條好短嘅路，但都好擔心有警察！」
Angelababy
「最近好鍾意星星圖案，會周圍畫，仲會喺身上畫星星當紋身，今日喺手腕畫咗。」
糖妹
「我有個好變態嘅習慣，就係鍾意睇人唧黑頭。我仲好鍾意幫我細佬唧黑頭添！」
糖兄
「唔好睇我外表咁man，其實我好鍾意睇女性睇嘅雜誌同網頁o架！」
吳雨霏
「我向來好鍾意非洲嘅野生動物，例如大象、長頸鹿之類，仲經常會買公仔玩，因為夠軟，每次出trip我都會帶埋隻公仔一齊去，可以攬住瞓，依家陪緊我嗰隻公仔就係長頸鹿喇！」
莊思敏
「我一心情唔好就會亂買內衣，冇話特定咩款，買咗又未必着，揀內衣褲嘅原因係嗰啲舖頭靜啲，冇乜人，又唔會好似買手袋咁貴。」
Mandy Lieu
「我係鞋癡，會喪買鞋，有時仲唔理價錢，屋企有逾半百對鞋，又驚搵唔到而keep住啲鞋盒，仲影低對鞋，張相貼落鞋盒度。」
李玟
「我外表畀人感覺成熟認真，其實我係大細路，好鍾意扮鬼扮馬氹媽咪同老公，又會扮人聲，唔介意扮醜，鍾意做開心果。」
區文詩
「試過同朋友去飲酒，飲大咗去錯另一層玩，朋友周圍搵唔到我，結果我飲到冧咗，喺後樓梯過咗一晚，第二日先返去。」