賈思樂爆三哥瞓掂戚美珍

勸鵬哥息怒 反被鬧喊

賈：我哋一家人成日都定時約出嚟食飯，維繫感情，鵬哥都出，但佢只會靜靜地坐喺度唔出聲，唔係好似幕前咁生鬼！

林：佢以前冇咁驕傲，依家驕傲好多！

阿苗兩公婆與盧海鵬、林建明、賈思樂等老友鬼鬼，經常見面維繫感情。

阿戚曾試過做和事老想勸掂鵬哥，可惜仲被鬧埋一份。

戚：年紀大咗有脾氣，返老還童啫！

賈思樂	賈思樂與阿戚在《蝦》劇內飾演夫妻。	鵬哥跟賈思樂分別飾演傳統老竇及西化兒子。

林：知唔知咩叫迴光返照呀！嗰次因為《蝦仔爹哋Ⅱ》舞台劇試造型，阿鵬對個造型唔係好鍾意而發脾氣，佢連我都鬧！Who are you？阿戚叫我勸佢結果搞到被佢鬧咪內疚喊囉！之後我都有教訓佢，鬧到佢頭耷耷！

賈：鵬哥係鍾意講粗口，以前我哋做《歡樂今宵》佢十句中一半都係粗口，我廣東話唔叻但我都識聽！

林：不過，阿鵬講嗰啲粗口唔係核突，係搞笑，變咗係佢嘅言語，咁大個人改唔到，所以佢一講我就行開唔聽，我係淑女！

賈：淑女？哈哈哈哈………

林：你咩態度？阿仔唔生性（《蝦》劇中賈思樂做她兒子），家嫂（指劇中演賈思樂老婆戚美珍）就好好，現實生活中佢對老公苗僑偉好好！我有次聽講苗僑偉好緊張你會死！

戚：上年我哋演完《蝦》舞台劇後去咗拉斯維加斯玩，返嚟香港時可能仲有時差，未回魂，沖完涼出嚟滑倒，個後腦撞埋去浴缸個扶手度，當場冇知覺，我老公驚我死！醒番後，個瘤都要兩、三個月後先散！

林：唔怪得你咁傻啦！《蝦Ⅱ》咁辛苦你都做，呢啲咪後遺症囉！

約齊好朋友 欣賞《港姐》

戚：今次幫《明星足球隊》嘅「扶老基金」籌款，為老人家冇所謂，老公都幫我手搵贊助，個個知道幫老人家籌款唔使問就捐！交收嗰日，有位善長聽沙姐講話加碼，佢就雙倍畀多廿萬，賈思樂都好幫手，又一齊研究劇本，因為今年多咗好多嘉賓，個個都唔同性格，想設計一個好靚個位畀佢哋出嚟！

林：阿戚同阿苗咁好，其實我見證住佢哋拍拖！嗰時做《歡樂今宵》，「黑o靚仔」成日嚟等阿戚收工！

戚：「黑o靚仔」呢個花名佢哋叫咗幾十年，因為我老公後生時好黑！

賈：我哋成班人如阿戚、阿苗、黃日華、鄭裕玲、石修…一齊玩，一年一度大事就係約埋睇《香港小姐》，試過去大嶼山、赤柱，租個地方一齊睇之後就過埋夜，好似大笪地咁喺地度瞓，嗰時未做《蝦》劇，但我都發覺阿苗對阿戚有意思，我叫大家搵個位瞓啦……阿苗就攞住枕頭，借啲意去阿戚嗰邊瞓，想親近佢！

林：嘩！你哋大被同眠？我呢啲咁高貴，點會隨便同人瞓，所以我冇同你哋一齊玩！

文：影視組　

攝：司徒國榮　

戚美珍服裝：Loewe