JJ 身材走樣 網民噓爆

無綫劇集《名媛望族》一直被指重口味，繼安排三太江美儀以黑絲襪情挑劉松仁被網民狂踩後，前晚播出宅男女神JJ穿上黑色性感褻衣，在鏡頭前騷三吋事業線，同被網民插爆，指JJ又肥兼雞仔聲，慘不忍睹。

拆pad減胸湧

JJ昨日由橫店返港，晚上單拖出席李璨琛婚宴，她在電話中受訪時談到在劇中的性感演出時說：「我啱啱落機，未睇播成點，拍嗰時同導演研究過件褻衣會唔會太性感？導演話為突出角色性格，要咁拍，出嚟要有效果，我就順應導演要求。」

對於被網民批評身材走樣與雞仔聲，她承認拍攝期間確肥了不少：「所以本來件褻衣有個墊，最後都拆咗，點知拆咗都咁嘅效果，唔拆會仲誇張。我依家有D cup，肥嗰時有E cup以上。（唔驚被投訴？）電視尺度有限，唔會太色情，依家效果幾好。（男友樊少皇點睇？）佢唔喺香港，冇睇到。（佢唔鍾意？）唔緊要嘅，拍劇啫，電視尺度有限。」

周志文撐美儀

除了JJ在劇中晒事業線，同劇演啞女「季小茹」的林穎彤（Bella）前晚也在處境劇《愛．回家》的預告片中晒兩吋事業線，即引起網友在討論區議論紛紛，更將她與JJ相提並論：「『大面Bella』同JJ都露亂溝，今晚無綫做乜事？」此外，有份演出《名》劇的演員周志文看過前晚的劇情，昨出席活動的他說：「JJ同江美儀，我揀江美儀，佢身材keep得好、演技好，又好照顧我，內外兼備。（嫌棄JJ？）佢都係好多人心目中女神，各有千秋！」

文：影視組