達明「偷走」賀李璨琛結婚

37歲琛仔終於結束「冇腳雀仔」生涯，與拍拖多年的女友Pae組織小家庭。繼昨午註冊及接新娘等儀式後，一對新人昨晚筵開39席喜宴招待親友，不少圈中人畀面到賀，就連早前身患癌病的張達明亦現身。

劉浩龍避談祖兒

達明約於晚上七時抵達酒店，身穿外套、T恤的他精神狀態明顯不錯，大病初愈體重似乎亦回升不少。他未有停步接受訪問，即內進禮堂逗留了15分鐘，離開時還大擺MJ甫士讓記者拍照，達明表示：「我OK呀，今日偷走出嚟賀琛仔嘅，好開心佢咁靚仔，不過要留低食飯就唔係幾好嘞。」據悉，達明年前與琛仔合拍電影《嚦咕嚦咕對對碰》、《龍咁威》以及《兩個傻瓜的荒唐事》等，由於合作無間，私交甚篤可想而知，難怪大病初愈的他堅持現身贈興。

大病初愈的張達明酒店門外大擺ＭＪ甫士讓記者拍照，生猛非常。

李璨琛與老婆被要求咀嘴，男方竟害羞得面紅耳赤。

劉浩龍單拖現身時，被記者追問何不帶同女友容祖兒到場？一向EQ低的他聞言即回應：「超！今日李璨琛結婚，我祝佢連生貴子、三年抱兩、生意興隆。」記者繼續再提祖兒，他全程左顧右盼，最終更戲言以「要上樓睇有咩表演」及「兄弟call有事」等藉口，成功逃脫追訪。

黃子華畀面出席琛仔婚宴。	李璨琛新劇女主角黃芝琪亦畀面出席婚宴。	陳奕迅與徐濠縈到場賀琛仔成人夫。

一對新人昨午翹手於酒店大門接受訪問，期間新娘子體貼為老公整理衣領及煲呔，當記者要求二人咀嘴時，琛仔竟面紅耳赤。他透露前晚二人分別回家上頭後便入住酒店，昨早他率領16人兄弟團大戰8人姊妹團，最終以約五位數的開門利是成功接得美人歸，他又指註冊時自己眼泛淚光，且緊張到腋下盡濕。

寸無綫冇人情味

至於生育大計，琛仔謂：「應該會兩年後。等我拍完套劇先，1月1日就會同老婆出發去馬爾代夫度蜜月。」問到接新娘有否遭留難時，他表示：「要我同啲兄弟兩個人一齊用口剝一條蕉皮，濕立立好核突。」琛仔又指原本有派喜帖給《怒火街頭》一班好兄弟，但不少演員出埠拍劇，留港的林子善亦未知要否開工，他更大嘆無綫冇人情味不肯放人。

另外，婚宴開席前，大會播放預先準備好的短片娛賓，一對新人化身卡通人物大跳勁舞，心思花盡博得全場掌聲，琛仔與Pae換過禮服即上台祝酒切蛋糕，場面感人。

採訪：影視組