朱晨麗拋開港姐包袱搏到盡
2011年港姐冠軍朱晨麗（Rebecca）當選後，除擔任綜藝節目《功夫新星》主持，更有與劉松仁、吳鎮宇等一線藝人拍攝多套無綫重頭劇，獲無綫力捧成新一代花旦。
有「翻版陳法拉」之稱的Rebecca首次參演近日熱爆的劇集《名媛望族》，先後與老公馬國明及姦夫吳卓羲激咀，為演活角色拋開港姐高貴形象。
不過她笑言好好玩：「拍劇有好多嘢學，可以試好多角色。主持就做番自己，好唔同。我認為人一世要試做唔同角色，但我承認自己演技仲需要多啲訓練同要努力學習。拍之前我都會向前輩請教，有時有啲繁體字唔識讀，佢哋都好細心教我。（抗拒拍激情戲？）我唔會Say No。不過電視尺度嚴謹，都唔怕。」她又透露目前忙拍新劇《衝上雲霄Ⅱ》及《情逆三世緣》。
Profile
出生日期：1987年12月2日
身高：1.68米
體重：48kg
學歷：香港演藝學院舞蹈學院
作品：電影《Laughing Gor之潛罪犯》；劇集《名媛望族》、《衝上雲霄Ⅱ》及《情逆三世緣》