陳偉霆瘋狂小學雞大報復洩糞

同類題材 唔怕比較

九十年代始，鄭伊健創下一股「蠱惑仔風」成為一時佳話。沉寂多年的蠱惑仔題材電影，突然鹹魚翻生掀起熱潮！英皇電影《紮職》中，William獲選任男主角。面對突如其來同類題材的電影競爭，他揚言做好自己，冇有怕！

蠱惑仔風絕對係好事，因為我哋決定開呢部戲嘅時候係好早，開拍前籌備咗接近半年時間，當時大家充滿住冒險精神。因為呢幾年真係冇一部真正關於蠱惑仔嘅戲，唔知係咪驚市場唔接受。不過大家拍嘅時候都好夠薑，仲有好多晒馬場面。其實拍呢套戲嘅費用都唔少，當我哋拍完之後先發現再有人開蠱惑仔戲，就突然覺得我哋條路係行啱。其實有記者成日問我會唔會驚同其他蠱惑仔電影比較，不過我覺得冇乜必要比較，因為電影劇本同背景好唔同。

近年陳偉霆主攻電影，但他不會放棄歌唱事業。	陳偉霆為求演出逼真，叫其他演員真打不留力，被打腫面亦在所不惜。	陳偉霆（右）於新片行蠱惑兼劈友，拋開偶像包袱。

拋開形象 打到九彩

做得蠱惑仔就要「食得鹹魚抵得渴」，打打殺殺場面更是電影中必備。自言拍戲冇底線的William一於搏到盡，為求逼真，他更不介意「打真軍」，被毆至口腫面腫也在所不惜。

陳偉霆似大細路，受訪時表情多多。	放大圖片	身為阿Sa男友的陳偉霆，不希望大眾只專注其感情生活。

第一，做演員係唔應該有底線！如果你要喺電影發展就要拋開歌手包袱。第二，依家觀眾好醒，你代入唔到個角色，佢哋會覺得你唔好。當我接到劇本絕對唔會諸多要求，盡量為劇本好。記得要拍一場打鬥戲，我被人打腫咗塊右邊面，當時喺酒吧至少畀人打咗四、五個鐘頭，咁大個仔都未試過被人打得咁勁！跟住我仲叫佢哋真打，因為想有「砰砰聲」嘅逼真感覺，搞到之後導演拍嘅時候要影我左邊面！仲記得嗰陣連吳浩康未埋位，佢瞓緊覺都被我打嘅聲嘈醒，跟住佢起身問：「發生乜事？佢仲畀人打緊，瞓番先！」

叛逆性格 闖下大禍

蠱惑仔予人感覺就是叛逆到不行，William雖不是真正蠱惑仔，但他一樣擁有叛逆性格，而且更由小學雞已開始醞釀。為了報復讓他含冤受屈的同班同學，竟出到終極「那渣手段」。

小學時試過畀同班同學屈我偷嘢，當時我好嬲，為咗報復，我就準備咗啲包書膠，然後走入廁所炮製「糞便炸彈」，再將舊嘢放入同學個書包入面，依家諗番都覺得真係好曳！

當然我唔會深入話畀你知，啲糞便點嚟啦，等呢件事留番啲白位。件事嘅結果係，我畀嗰位同學告發，仲要畀老師記咗大過，不過我都覺得自己係抵罰嘅，呢件事亦令我明白到，報仇係冇好結果嘅。

搏到最盡盼人認同

William咁搏為乜？無他，就是希望讓更多的人認同他。雖然近年負面聲音不絕，但William懶理抨擊，努力工作，決意憑時間證明自己是全能藝人。

對於網上抨擊，已經唔會唔開心，呢幾年都慣，最緊要識得喺逆境生存，盡量做多啲作品畀人睇。我唔介意人哋唔識我，但我會用時間令人認識自己。暫時有好多人都畀機會我，所以我會做好啲。就算之前有幾唔開心，都係咬緊牙關去過。坦白講，雖然有唔支持自己嘅人，但同時亦有好多支持我嘅人。人係有判斷能力，當你分辨到邊啲人係針對你同支持你，然後再去啱嘅方向去做就得。我希望可以儲更多人生閱歷，然後慢慢變成一個成熟、有進步嘅人！

不想提阿Sa

近期，William出席公開活動時都絕少提及女友蔡卓妍（阿Sa)，當小記問及有關阿Sa的問題時，他都再三鄭重地說：「希望大家可以將焦點放喺我工作上。」也許，William希望別人不要永遠記得他是阿Sa男友，而是在事業灑熱血的陳偉霆。

文：專案組

攝：黎志輝