林德信谷處男碟 Eason變粉絲
林子祥（Lam）兒子林德信（Alex）昨日出席處男專輯記者會，吸引偶像陳奕迅（Eason）及老竇Lam撐場，而緋聞女友吳雨霏（Kary）雖然未有現身打氣，但黐上鬍子扮相鬼馬的錄短片祝他新碟大賣，Eason則化身小歌迷反向Alex攞簽名，又笑指Alex未入行的長髮look濃密度多過其頭髮，引得全場捧腹大笑，Eason最後代公司送上結他給Alex。
阿Lam爆兜巴星
身為老竇的Lam以壓軸嘉賓上台，Lam坦言與仔仔都屬少說話的人，故由細到大都甚少傾父子偈，他又笑指叫Alex「唔好結婚住」，最後踢爆Alex細個因太曳激嬲他搞到要「兜巴星」，隨即搞Gag說：「所以依家變咗『星爸』。」Lam又笑指唱了40年歌都沒人讚他「靚仔」，即指住Alex說：「太多人讚你靚仔，搞到我都多人望咗。」
Kary拍片祝賀
Alex被問到緋聞女友Kary「無影」是否美中不足？他說：「唔係吖，佢都有拍片，知佢為個唱綵排。（老竇叫你唔好結婚住？）係啦，我都唔知點解。（老竇見過你女朋友？）依家我都冇拍拖。」至於為何成日被老竇「兜巴星」？Alex說：「唔記得，細個確實貪玩，成日同朋友出街出到好夜。（四處溝女？）唔係。」
文：音樂組