朱慧敏睇透避峰頭
港姐出身的朱慧敏及陳庭欣日前為台慶試靚衫，朱慧敏選擇玩透視騷美腿，走高貴路線避免與一眾無綫咪神交「峰」；反而陳庭欣就谷行「C家咪」以深長事業線對撼，擺到明要向咪神們下戰書！
一年一度的無綫台慶迫在眉睫，又是一班小花爭妍鬥麗的時候！為了成為萬綠叢中一點紅，朱慧敏（Queenie）及陳庭欣（Toby）日前頻撲試戰衣及首飾，務求到時一鳴驚人，成為全場焦點博影靚相。Queenie去年因為車禍受傷未能出席台慶，今年勢要踩行油打扮，先後試了各價值近十萬元的黑色魚尾裙及灰藍色透視裙。以前偏好彩色浮誇打扮的她，今次轉走簡約路線，顯得更端莊高貴。今年共有三套劇出街的Queenie未知可否入圍最佳女配角，反而笑言想攞「飛躍」獎，她說：「我之前為咗拍《愛．回家》而剪咗出世以嚟最短嘅髮型，對我嚟講係好大嘅挑戰，哈哈咁算唔算『飛躍』？」
佩戴逾360萬首飾
眼見無綫近來鬧花旦荒，Toby今趟盡地一煲，谷到雙咪變C Cup，勢要挑戰無綫一眾咪神，乘機上位！她試了三套高貴晚裝，不過最有睇頭的就非露前又露後的白色Deep V長裙莫屬，一雙宏偉殺人「胸」器直教宅男口水流。再配埋三套共值三百六十多萬元的Larry Jewelry首飾，「台慶look」正式完成！她不擔心到時會畀幾位咪神圍攻揮低，Toby說：「唔係想同人比較，最緊要着出嚟靚，反而最擔心自己大頭蝦會整唔見啲首飾！」
服裝：AOLISHA by Kev Yiu（朱慧敏）、Bridal Chorus（陳庭欣）
髮型：Match@HAiR（陳庭欣）
文：專案組