翠翠跌裂尾龍骨楊怡變豬蹄
無綫花旦小生連環受傷，葉翠翠前晚在家中不慎跣倒「跌裂」尾龍骨，需停工一個月；視后大熱楊怡早前拍劇時右腳拗柴而骨裂，至今仍腫到變「豬蹄」，男星沈震軒為台慶綵排而令左膝舊患復發，可謂各有各慘！
前港姐冠軍葉翠翠今年6月在內地拍劇不慎跣倒拗柴，令右腳腳背骨裂，事隔多月，她再度跣倒，認真黑仔！前晚約6時許，翠翠在家中不慎跣低，這道無情力令她尾龍骨跌裂，昨日翠翠接受電話訪問時，直言當時痛到喊：「我真係好驚，當時feel到一下『裂聲』，一度郁唔到，標晒冷汗，之後夾硬爬去攞電話打畀家人求救！」
獲緋聞男友安慰
送院後醫生證實其尾龍骨有數節骨裂，翠翠昨在微博上載X光片，並為自己打氣，翠翠續說：「醫生話算好彩，唔係最受力嗰幾節（受傷），亦唔會影響生育，（要抖幾耐？）都要一個月，呢幾日唔可以落床，淨係可以食止痛藥。」問到緋聞男友高鈞賢有否安慰？她說：「有，佢叫我小心啲。」她遺憾稱未能出席本月19日台慶。高鈞賢亦直言知翠翠受傷後不開心，問他會否前往探病？他說：「我會打電話畀佢，睇吓佢點先。」
另外，楊怡前晚穿上兩吋高跟鞋出席活動，被發現右腳踭腫起，她透露早前拍劇集《仁心解碼2》時要從高處跌下，怎料不慎拗柴：「當時無為意繼續拍動作戲，之後照X光先知腳踭（骨）有啲裂。」有傳徐子珊奪視后贏面大，楊怡自信十足說：「我唔會滅自己威風，都睇好自己，投自己一票，（叫緋聞男友羅仲謙投票？）身邊所有人都會叫，（投番佢？）吓，如果佢有份就投佢！」提到早前誤傳鄧梓峰和吳綺莉車震，她表示不知情不回應，曾被指與羅仲謙「同車」的她，問到可覺得巧合？她說：「唔覺，清者自清，唔好傷害藝人，（即係話之前傷害你啦？）簡直係憤怒。」
沈震軒舊患復發
沈震軒亦在微博上載左膝受傷相，透露為台慶節目綵排時令左膝韌帶舊患復發，現已看跌打，並減低表演難度，望可繼續表演。此外，他昨晚堅持負傷拍撞車戲份免影響進度。
文：專案組