Joey為母打杜德偉主意
樂壇天后容祖兒近年醉心研究時裝，平日不用上台表演，即相約一眾工作人員及排舞師大玩dress code，令日常的排舞生活變得不再平凡。頒獎禮舉行在即，祖兒反而想同媽咪偶像杜德偉合作。
容祖兒（Joey）每次見人都活力十足，動力來源全靠cosplay！祖兒說：「前年舉行個人演唱會嗰陣，日日對住班同事排舞，晚晚跳通頂，真係好辛苦，惟有搵啲嘢衝擊下，我哋每日排舞都會夾着衫主題，例如迷彩、懷舊look、仲試過着睡衣排舞。」她更笑言：「邊唱邊跳唔走音真係好難，今年我喺新歌《加大力度》排舞所需嘅體力就足以去考警察！」
鍾意包拗頸
各大音樂頒獎禮將至，對於拎獎祖兒抱的是平常心，現階段除了獎項，最希望可以有更多新嘗試：「我最想可以同前輩杜德偉合唱，因為媽咪好迷戀佢，如果真係成功，媽咪一定錫死我。」
乖乖女祖兒自言性格衝動似足憤怒鳥，一有idea就要即刻行動：「我好反叛，鍾意包拗頸，性格好似憤怒鳥裏面嘅黃色小鳥，一定要衝！」舞台上的祖兒華麗動人，台下的她喜愛簡單平淡：「做嘢時我成日要bling bling，戴好多飾物，其實如果唔使返工我鍾意隨意笠件簡單T恤就出街。我做咗bossini代言人三年，因為佢好反映到我嘅性格係開心、casual。」
想收聖誕樹
聖誕將至，祖兒渴望收到聖誕樹作禮物，原來一直以來都未試過在家擺聖誕樹，今年好想有人送棵真聖誕樹給她：「最好幫我布置埋，喺樹底又放幾份聖誕禮物啦。（收過咩令你最難忘嘅聖誕禮物？）唔記得啦，暫時冇特別，希望今年可以收到啦。」愛祖兒的有心人，識做啦！
文：李佩珊
攝影：沈健程
服裝：bossini