鄧麗欣暫忘小方︰同佢分開吓
鄧麗欣在圈中有今日成就，她坦言要多謝圈中三個男人，雖然方力申榜上有名，但她笑言在新片中要與他「分開」轉投黃宗澤懷抱，更叫大家要「洗洗腦」，在她身上忘記小方。
我在娛樂圈有今日的成就，真係要多謝三個人。第一個當然係黃柏高，佢由我一張白紙捧我到依家咁多姿多采，係我嘅啟蒙老師。第二位係葉念琛，佢為我電影發展開拓咗一條道路，教識咗我好多嘢。第三位都係男性，佢係方力申，同佢一齊工作令我可以放鬆，佢份人好樂觀、好積極，好肯為人着想，作為戰友會畀佢感染到嗰種快樂，佢性格好好，可以話係絕種好男仔，多謝佢父母教育咁好。其實同方力申合作咗好長時間，依家終於有機會同佢「分開吓」，希望大家可以洗洗腦，同佢合作有壓力會難進步。
愛姿整男仔
喺新片《等‧我愛你》中我同黃宗澤演一對，黃宗澤佢份人好細心、好浪漫，好少有一個咁有條理嘅男仔，同佢傾偈知佢好鍾意執嘢、好乾淨，我好欣賞呢類男仔，畀我識佢時成熟咗好多。今次同佢合作擦出新火花，一定為觀眾帶來新鮮感，今次嘅愛情線亦都比以往較為成熟。
中港兩邊走
近年我經常香港內地兩邊走，初時真係有啲唔習慣，令我有種不安嘅感覺，思緒亦變得好亂，同家人相處時間變相少咗。好彩家人好明白我，我亦多得公司有人照顧，加上我無應酬習慣，媽媽比較放心。好多關心我嘅朋友叫我工作唔好太勞碌，但我覺得趁後生時可以辛苦，老來可以享受，將來可以做自己鍾意做嘅事。就算結咗婚我都會繼續做，依家係播種期，收成期再計劃人生下一步點走。（完）
口述：鄧麗欣
筆錄：影視組