陳偉霆詩雅被追斬 險成車下魂

陳偉霆及詩雅在英皇電影《紮職》中再演情侶，男主角William飾演食腦江湖中人，但不能幸免有多場激烈搏鬥戲，打到血肉橫飛！問到會否怕鏡頭太血腥？William直言並非賣弄，只希望畫面更真實，因此惟有犧牲內地市場，打造最地道的黑幫片，他說：「頭幾日我都係捱打，導演解釋我打不死先紮到職，好似聖鬥士咁！」

唔使阿Sa安慰

說到最難忘的一場戲份，William說：「兄弟大廝殺嗰場真係好真實，嗰半個鐘心跳得好快，好唔舒服！另外就有幕有二百個演員企晒喺佐敦，呢場戲都好震撼！（做咗三級男星？）係呀！但冇任何色情，只因題材同術語比較敏感。」

詩雅在現場看了多場打鬥戲，見到同伴受傷，也不禁心痛。

William表示新片Sell真實故事，對於最近亦有蠱惑仔電影開拍，證明他們路線正確。

另一場戲，William及詩雅被刀手揸車追斬，跑到濕身氣喘，更險成為車下亡魂，William說：「第一Take未預到距離，擰轉頭望發現架車勁近，得幾寸！如果停低真係會撞死！最搞笑係其他刀手愈跑愈開，原來佢哋都驚畀車撞到！」

堅持「真劈」的William最終周身傷，但不用女友蔡卓妍（阿Sa）安慰：「手同臉因為擋刀，又瘀又損！（阿Sa有冇安慰你？）唔使，做嘢吖嘛！反而我要留住啲傷痕，有痛嘅感覺會更投入角色！」

想轉型做打女

不過，型爆大佬亦有（火羅）事，詩雅大爆William竟以「天殘腳」誤傷其玉手：「佢當時要救我，點知太心急，一腳踩落我隻手度，我痛到以為隻手碎咗！（想做打女？）好呀！我鍾意吊威吔，都想劈埋一份！」

陳偉霆化妝：Khaki　

髮型：Davy Yu＠Ching

詩雅化妝：Meegan＠Bridal Corner

髮型：Daniel Cheng＠Ching

服裝：Bauhaus

場地：Club Prince

文：立影

攝：黎志輝