蔡少芬「好」感恩 默認佗男B
早前在微博透露懷有第二胎的蔡少芬（Ada），昨日挺着大肚為護膚品牌拍廣告。剛獲悉腹中塊肉性別的她，堅拒透露端倪，但直言刻下「好」感恩，相信為女兒楚兒添名弟弟的成數頗高，她又謂兩個已經夠數，生完此胎即封肚。
Ada昨午腳踏3、4吋高跟鞋現身，懷胎數月的她身形仍然弗爆，只是肚皮長肉，一臉幸福。她不欲透露懷孕周期，因擔心會影響工作機會，至於BB性別問題，她笑說：「留番啲嘢畀老公講。（你好滿足？）有第一胎好快樂，依家就好感恩。（夠晒數？）咩都夠嘞，人生有咁多嘢好滿足，向來都好美滿。本嚟有諗過生3個，不過朋友話如果係生4個好啲，所以我決定生埋停工嘞。」她又爆女兒楚兒最近很易呷醋，經常扭計要抱。
害喜頻繁呻辛苦
Ada又坦承懷着囡囡時，自己比較舒服，然這胎卻經常害喜，十分辛苦。當記者打趣指她懷上男丁時，她甜笑沒有即時否認，又指自己希望工作到產前：「我休息就容易病嘞，之前仲諗過接戲拍添。依家會選擇比較輕鬆啲嘅工作，最近開始忙自己嘅童裝品牌囉。」Ada又搞笑謂：「第一日知道有咗，已經覺得自己個肚好大，醫生話因為生過，所以肚皮鬆咗，希望生完唔會咁啦。」而昨日品牌老闆娘送上BB氣球公仔，以及減肥器給Ada，着她產後使用，氹得靚媽開心不已。
文、攝：影視組