吳雨霏大閘蟹溝中藥險暴斃
歌手吳雨霏（Kary）昨日抱恙出席活動，她透露前日在內地用膳時將大閘蟹混和中藥進食，以至心跳加速，她一度以為自己有隱性心臟病會暴斃家中，大步檻過的Kary聞蟹色變，聲言以後不敢再食。
吳雨霏與組合糖兄妹昨日出席記者會並即席獻唱，身穿開窿連身裙的Kary透露昨日是帶病上陣，她表示前晚在大陸工作後，留在當地吃大閘蟹，怎料卻病從口入：「隻蟹都好大隻同有好多蟹膏，食到一半嘅時候，我已經覺得心跳得好快同暈暈哋，後來休息咗10分鐘先再食，之後我仲喺酒樓食埋中藥先走。點知返到屋企發覺心跳得好快，超級唔舒服，快到我以為自己有隱性心臟病，我真係以為自己尋晚會死。」
時值夜深冇人理
Kary坦言當時已無力叫救護車，由於已是夜深，通知家人也沒有人理睬她，問到有否通知男友？她說：「冇呀﹗最後我都唔知自己係瞓咗定係暈咗。今日已即時去咗睇醫生，醫生話中藥同蟹係唔可以一齊食。我以後都唔敢食蟹。其實我向來對蝦蟹有少少敏感，但見到咁多膏好開心，忍唔住唔食，冇諗過食一隻會搞到咁大鑊，差啲搞出人命。（點解食中藥？）調理身體，我身體向來弱。」另外，Kary開心宣布其演唱會會加場，並有信心加場也會爆滿，問到會否在開騷前戒食海鮮？她無奈說：「都要，我仲會食少啲肉，因為好多食物都加咗激素，所以盡量少食。」
糖妹雲南助建屋
而糖妹表示明年一月將會到雲南探訪及幫手建屋，她說：「我希望可以帶埋我個14歲嘅細佬去體驗吓，等佢知道自己有幾幸福。（有冇咩要準備？）帶多幾條打底褲，因為會好凍，同埋想帶啲簡單嘅樂器送畀當地小朋友。」
文：名人組