苟芸慧苦練電眼撼香香

無綫台慶臨近，全台藝員開始練習不同表演環節，其中一Part集合近20位美女跳舞娛賓，分組大玩春夏秋冬概念，其中苟芸慧、王君馨、朱晨麗、莊思明、朱璇、李雪瑩、何傲兒、林夏薇及許亦妮等九人昨日首次排練，眾女休息時間即雞啄唔斷，又用即影即有相機自拍。

個性「滋油」慢熱的苟姑娘透露將大跳夏日Hot爆辣舞，與同是宅男女神的高海寧及岑麗香等，演繹韓國女歌手泫雅的舞曲《Bubble Pop》，她直言是個挑戰，練好Steps後要苦練放電：「呢次係快舞，要用力又要有節拍感，幾乎冇跳過，以前跳中國舞同芭蕾舞，但整親背脊骨，所以要就住。（舞衣性感？）仲未知係點，但一定好靚，唔介意有少少Sexy。」

多位青春美女一同合作，將在台慶舞動四季。

香香直言聖誕可能要在工作中度過。

朱晨麗雙保險上陣

冬天組的王君馨自誇因夠型，配合Cool爆舞種，本身有跳舞底子的她表示樂於教舞，但不會扮師姐，但如果有人問到可以提點下要注意眼神同表情。秋天組的朱晨麗笑言要表現高貴感覺絕無難度，反而另一環節扮蜘蛛精空中爬網更困難：「上次跳敦煌舞有男仔幫，今次靠晒自己力，應該冇威吔添！（買保險？）公司有！自己都會買！」

此外，「香香公主」岑麗香昨日出席商場活動，她表示近來忙於為台慶表演綵排，笑言欠跳舞經驗要練習惡補，至於聖誕卻未有慶祝計劃，相信要在工作中度過。

文：影視組