鄧麗欣暗許方心：睇佢有冇誠意
鄧麗欣（Stephy）2002年以女子組合Cookies成員姿態入行，到現今作獨立發展，剛好經歷了十個年頭。十年間，鄧麗欣的演藝事業經歷過高低起伏，也曾以不同形象尋求突破，不變的，卻是她與方力申傳足七年的緋聞。由今天開始，鄧麗欣將一連五日剖白內心世界和十年內經歷過的人和事。
我2002年加入金牌娛樂，好快就組成組合Cookies，直到2005年組合解散就開始作獨立發展，我同方力申合作過好多首歌和電影，成為銀幕情侶，更開始傳出緋聞。喺娛樂圈咁多年，其實冇乜人埋身追求，但係外間就以為我好多人追，其實真係冇；不過無論有定冇都好，其實自己都唔想，根本都無人會埋到我身。因為我唔鍾意太複雜嘅愛情關係，簡簡單單最好，太多波折自己會好辛苦。
同方力申緋聞傳咗好多年，好多時記者會問我想唔想要個「名分」，我覺得沒有呢個需要，喺呢個世代入面大家明白就可以，你估要爭家產咩？我完全冇呢個心態，呢樣嘢係「心甘命抵」，係自己嘅選擇。我唔知佢係咪咁諗，反而可能佢想要個名分，哈哈！但喺我所知嘅範圍內，佢應該可以嘅（滿意現狀）。外界經常提到「七年之癢」，我諗我未到啩。不過我之前都有驚過，因為好似好邪咁，好多人都會係咁，不過我覺得呢啲事係就係，唔係就唔係，冇得諗。見步行步，起碼自己已盡力。
2014或好日子
我身邊好多朋友已婚，佢哋都有叫我為自己打算一下，但我覺得遲啲先諗。我有諗過結婚問題，但一定唔係短時間內發生，咁急做乜？我又唔覺得拍拖時間長咗女仔會蝕底，呢個年代邊有咁緊張o架，三十幾先結婚生仔好正常。我有好多目標，要建立自己嘅嘢，我為人比較獨立，想先照顧到自己、家人先，唔使日後倚靠另一半。如果依家有人向我求婚，會睇吓佢有冇誠意啦！睇相佬批過我2012和2014年會有結婚運，2012都過咗大半，仲有2014，隨緣啦。最好笑早前有傳我已婚仲離埋婚，未結婚反而傳離婚，好經典嘅傳聞，傳到大家都以為真，唔通我連自己都唔知結咗婚未咩，咁大件事會同大家講。
不同公司少見面
其實我同方力申已經唔同公司，合作機會少咗，雖然近年我哋都主力內地發展事業，但其實經常天南地北唔會成日見面，大家係見少咗，不過對關係冇乜影響。兩個人最重要係信任，大家都做呢行應該會明白，就算畀傳媒拍到乜嘢都好，亦未必係真相。