杜德偉搶新娘離奇順攤
杜德偉（Alex）昨日小登科，與年輕24歲的嫩妻Ice拉埋天窗，他出動友情牌請來梁朝偉、鍾鎮濤（阿B）等星級好友組成伴郎團，豈料一眾兄弟慘變「人肉景點」，被不少女粉絲瘋索合照，搶盡風頭！Alex更笑言一眾姊妹可能被偉仔電暈，故搶新娘特別順攤。
現年50歲的杜德偉昨日在「四條一」光棍節迎娶26歲的嫩妻Ice。相識滿天下的Alex請來的伴郎團粒粒巨星，如梁朝偉、阿B及呂方等。昨日早上11時許，大玩懷舊風的Alex梳起飛機頭，率領一班星級兄弟在沙田凱悅酒店見記者及大派利是，再乘花車前往粉嶺迎接新娘兼玩過門遊戲。
累呂方做拱橋
由於新娘居於圍村，當他們抵達時，已有一大班村民守候等睇熱鬧，甫見新郎及一班星級伴郎時，更一家大細一擁而上，狂抓合照！縱然cool爆的偉仔一直刻意保持低調，但亦被一大班女村民重重包圍，搶盡風頭。
約在中午一時，一對新人及眾親友抵達婚禮場地深灣遊艇會，Alex與Ice全程糖黐豆，大晒恩愛。Alex更掛上外父送贈的金豬頸牌，兩人嘴對嘴錫錫，任影唔嬲！Alex自爆在玩搶新娘遊戲時慘輸累兄弟：「呂方要拱橋，其他兄弟要做掌上壓！（有糟質偉仔？）冇人敢玩佢！（電暈姊妹？）可能係，所以特別順攤！」他透露將與愛妻到夏威夷度蜜月，並在2年後才展開造人大計，又賣關子說：「已準備咗驚喜畀老婆！」兄弟團之一的偉仔與呂方曾合拍《新紮師兄》，當年兩人高度相若，事隔多年再碰頭，偉仔竟離奇增高，呂方足足矮一截。
婚宴筵開30席，宴會以50年代懷舊布置為主，更設有一輛巨型古董模型車作擺設。Alex以一身白馬王子Look與穿上性感婚紗的Ice一起切三層高的結婚蛋糕，蛋糕以紅白黑三色為主，Alex終在一片祝賀下，娶得美人歸。
文：音樂組