徐子淇助愛滋孤兒捐生日旅費
「千億新抱」徐子淇在老公李家誠傍實下，「胸」降慈善籌款晚會，為慈善不遺餘力的她坦言會將今年生日旅行的六位數字支出全數捐出，表示自己無欲無求，最重要是一家人身體健康！
徐子淇（Cathy）前晚以親善大使身份，與老公李家誠出席智行基金會L'Opera慈善籌款晚會，穿上本地設計師張潔雯設計的低胸魚尾晚裝裙的Cathy，谷出四吋長的事業線，再佩戴英皇鐘錶珠寶贊助的逾千二萬元鑽飾，性感又瑰麗。她表示晚會籌得四百萬元，大嘆款項籌得不易：「可能經濟唔好，世界又多災難，大家都唔開心，每分每毫對小朋友都好重要，雖然基金會已幫助內地九千個小朋友，聽落去好似好多，但事實有五十萬愛滋孤兒，真係幫唔晒，盡力幫到幾多就幾多。班貧窮小朋友嘅父母死咗，親戚唔要佢哋，受盡歧視，班小朋友本身係冇病，父母都係因為賣血而染上愛滋，我想大家知道佢哋面對嘅困難，明白佢哋處境！」
30歲心境似50
提到她本月29日生日，她說今年會留港慶祝：「每年生日都會去旅行，今年唔會去，將生日旅行嘅開支全部捐出，有六位數字。（想老公送甚麼生日禮物？）我同佢講唔使送，最重要一家人身體健康，不過我相信佢到時會畀驚喜小禮物我！」她又稱大女已有生日概念：「大女學緊整蛋糕，真係好sweet，而細女就會在旁幫手。」當提到她今年生日踏入三字頭時，她笑着表示自己在十多年前的心境已三十歲：「三十歲心境就好似五十歲，因為我十四歲出嚟做嘢，青少年生活過得唔多，認識都係大人，而且我又早結婚生BB。」至於生日願望？她坦言希望世界和平：「天氣太反常，唔好有咁多災難，健康平安就開心。」
老公係大細路
問她老公李家誠是否一個大細路？她直認不諱：「都係個大細路，佢大我12年，但感覺大家都差唔多年紀，因為女仔早熟，男仔就baby啲，鍾意人照顧。我覺得佢只係大我幾年，年齡上唔係差好遠，佢喺知識上真係叻我好多，我乜都會問佢，佢教到我好多，大家嘅興趣又差唔多！」
文：名人組