Toby妙語教精懷春糖妹
演電視的梁靖琪（Toby）和歌手糖妹（黃山怡）看似「大纜扯唔埋」，原來二人年初因合作電視劇《戀愛季節》而成為好姊妹，25歲糖妹少女懷春，無論戀愛、身形、人生甚至演戲都愛向Toby請教，更以「家姐」稱呼！有謂娛樂圈是令人急速成長之地，即使只比糖妹年長4歲的人妻Toby亦有資格賜教，體會人生幻變的Toby贈言：「乜都可以變，你嘅真個性就唔變得！」
欣賞大家夠真
梁：我哋拍完《戀》劇做咗好朋友，我最鍾意啲朋友係性格好真，身邊有一個係鄧穎芝，第二個就係你喇糖妹！所以就算拍完劇冇見，大家都會Chat吓！
糖：我由周刊上認識你之外，就到真正合作拍劇，原來你完全唔識中文，不過就好識教我做戲！我第一次拍劇，有人願意提點好重要，肯教我嘅……即證明係值得教，我好記得呢一幕！
梁：新人係需要人幫，我睇你就好似睇番自己當年入行咁。我第一套劇合作嘅人係有劉松仁、蘇玉華，佢哋好肯教我，好好彩，我先冇咁緊張！你喺個劇中演好調皮嘅角色，演嚟要好輕鬆，但見你有啲Confused，我咪索性做一次反應畀你睇囉，我都有同導演講，呢啲表情係我五年前做過o架！見到你就好似見到我自己！
跟「家姐」學嘢
糖：同「家姐」（Toby）一齊會知你做Wedding Planner，成日要見客，我成日問你如果有大Project都想跟埋去學嘢，我未入行前都做過同類工作，話唔埋第時我都可能有自己嘅Team，家姐你已經做到成績當然要學吓，唔好蝕吖嘛！
梁：人生漫漫長路，好多嘢要學，我係過來人，會知道所講嘅嘢會影響到人哋，又唔可以討好每個人，甚至有反效果，呢幾年我大半係負面新聞，教識我不如做好自己本分，好似你性格好好，夠真，我留意到你只會靜靜哋聽人講嘢，想講都唔會講，只做聆聽者，好可愛，又唔介意話畀人知住邊度，即使感情都唔會收埋，好似當年啲人問我有冇拍拖，我話冇都冇人信啦！
分享戀愛煩惱
糖：我嘅愛情事都會同家姐傾，唔介意畀人知我拍緊拖，但唔會特別講，好彩大家都接受，當然，我會專心工作囉！
梁：歌手因為顧形象，壓力會大啲！
糖：都冇乜新聞攻擊我嘅……唯一係話我高度啫！當一個指標咁講……我高過小儀囉！其實都想形象上有啲改變，好想做度好Slim嗰啲女仔，好想着靚衫！
梁：中國人成日以為好瘦、好長腿、胸好大就係靚，其實，我覺得你應該做番自己先，大定就會捉到自己定位，好似我癲癲得得，都想做「電視版吳君如」！不過，依家我就覺得你似陳慧嫻……唱首歌嚟聽吓先啦！哈哈！
談夢想婚禮
糖：我都有幻想自己Dream Wedding，我怕家姐你搵夠喇，唔使做，去環遊世界咋……
梁：我點捨得，退休都會幫你！我記得……你想草地上舉行一個赤腳婚禮，好舒服咁同一班朋友玩一日，靜靜哋咁過嘛……
糖：係呀！我覺得結婚係兩個人嘅事，唔使同咁多人交代！
梁：好多朋友都咁諗，但我哋係中國人，父母會諗，嫁女喎！其實我結婚時都唔想喺香港舉行，有幻想去吓沙灘呀……
糖：又係……唔通叫老爺、奶奶行沙灘，又要有隻乳豬喎！哈哈！
梁：梁靖琪
糖：糖妹
採訪：影視組
攝影：林楠
場地：GrandCentral