馬國明死撐有say冇尷尬
無綫型男馬國明前晚與無綫其他小生花旦突襲銅鑼灣行人專用區，拍攝台慶特輯，近百位市民塞滿街頭圍觀，非常墟冚，但論搶鏡度都不及他與舊愛胡定欣同場，現場所見兩人全程零交流，但事後馬國明否認二人不和︰「不嬲都冇嘢。」
本月19日是無綫45周年台慶，前晚不少無綫小生花旦如馬國明、胡定欣、黃智雯、梁烈唯，以及陳庭欣、麥長青、李綺雯和緋聞男女龔嘉欣和許家傑等現身銅鑼灣鬧市拍攝台慶特輯，眾人約晚上八點半於附近酒店集合，再殺入行人專用區，吸引近百位市民塞爆街頭圍觀。過氣情侶馬國明與胡定欣，夾着TVBuddy公仔企頭位拍攝，但全程零交流，及後兩人再隔着梁烈唯和黃智雯拍攝，而馬國明全程只與身旁的黃智雯閒聊吹水，約半小時後一行人登上花車轉往旺角繼續拍攝。而龔嘉欣表示和許家傑同場不感尷尬。
馬國明昨日在電話中否認與舊愛胡定欣互當透明，他說︰「大家有交流，不嬲都冇嘢，而且唔覺尷尬，我同個個都有交流。」對於企頭位拍攝，他則說︰「其實分咗幾group拍，我哋只係其中一組，不過都多謝公司。」他又指因要離港拍劇，台慶當日不在香港，故現在拍定特輯。事後龔嘉欣接受電話訪問表示與許家傑的緋聞只覺得啖笑！
黃智雯恨爬繩索
至於黃智雯昨日接受電話訪問，直言正忙為台慶表演爬繩索和跳舞綵排，她說︰「我未去練爬繩索，聽聞好多女仔都練到瘀晒，但我唔驚，好期待。」她表示台慶的戰衣正趕工中，但直言不太性感，她說︰「我向來都唔會着得太暴露，冇諗過要同人比較。」
文：專案組