吳綺莉被囡囡寸：夢遊呀
吳綺莉近日無辜捲入「車震」事件，但卻未因此而影響心情，昨日做「跟得媽媽」帶小龍女去學騎馬及結他，她表示當笑話一則及自爆被女兒取笑是「夢遊」；而同樣被拉落水的男主角鄧梓峰，多得吳鎮宇講笑話安慰，心情好番好多。
近日網上瘋傳有藝員在深夜時於新界八鄉被警察「照田雞」，當中男女主角直指無綫劇《雷霆掃毒》演員吳綺莉及鄧梓峰。無厘頭捲入車震事件的吳綺莉，心情沒有因而受到影響，昨日下午2時，她與女兒駕車離開大埔寓所，先往購買幾份報紙，然後帶囡囡往上水騎術學校，跟李家鼎學騎馬，兩母女見記者都笑笑口。學完騎馬，她再帶女兒到大埔學結他，至晚上6時許才返家。
唔怕影響形象
對於捲入車震事件，吳綺莉表示笑話一則，前晚她接受在電台訪問，被問到其女兒點睇車震事件，她表示：「個女都問我夜麻麻出街係咪夢遊，大家講笑啫！我同鄧梓峰已經唔熟。（會否追究？）有問過朋友當警察嘅老公，佢哋話一個傳一個，傳下傳下當係真咁講，如果真係就拎證據出嚟！（擔心影響形象？）唔擔心，係假都唔會信，（擔心女兒面對同學仔？）個女已經習慣應付啲複雜嘅事，都唔擔心。」提到鄧梓峰已交由律師處理，她說：「佢搞就啱喇！我就唔會。」
多謝大家信任
而同樣無辜被拖落水、身在英國拍攝無綫劇《衝上雲霄II》鄧梓峰，昨日接受本報電話訪問表示：「我一次過在微博交代，亦同律師溝通過，網上傳聞好難搵真兇，同太太都通過電話，總之要喺法律上爭取清白。」而他昨日凌晨在微博感謝大家對他的支持及信任，本來好憤怒的他表示：「因吳鎮宇一個笑話令我大笑，所以心情好番好多。」另外，有份演《雷》劇的官恩娜，前晚在活動上表示不會相信傳聞。
文、攝：追蹤組