黎芷珊自嘲變態 伊健受氣
榮升成為星級主持的黎芷珊，主持節目時魅力十足，成功吸引巨星們成為其嘉賓，鏡頭後的芷珊感情生活亦一樣多姿多采，曾與多位型男擦出愛火花，不過芷珊竟自爆自己性格「變態」！
無綫主持黎芷珊不但在節目中成功請得多位視帝、影帝成為其嘉賓，她亦曾與影帝梁家輝、型男鄭伊健譜戀曲，但芷珊竟自爆少女時代的她「難頂」：「伊健以前同我拍拖時成日都要受我氣，因為只要我一見到佢同女仔傾偈，我就會發脾氣，所以我哋成日嗌交！」芷珊更形容自己變態：「我真係可以用變態嚟形容！其實伊健唔花弗，又唔會主動撩女仔，但係我哋拍拖時，我變態到禁止佢同女仔傾偈，就算係正常社交都唔得！（呢個係你哋分手嘅原因？）可能係！其實我哋從來都無講過分手，只係佢由兒童節目轉去拍劇之後太忙，大家少咗聯絡，之後戀情就無疾而終！」
型男愛隨和
對於如何成功令一眾型男拜倒其石榴裙下，芷珊笑言：「真係唔知！其實我又唔係靚女，可能初相識時佢哋覺得我性格隨和、易相處，我真係要請多次班舊愛上《最佳男主角》問佢哋點解鍾意我先得，哈哈！」芷珊最近主持的節目備受網友激讚，芷珊坦言受寵若驚：「《最佳男主角》效果好係意料中事，因為班巨星嘉賓好有睇頭，但估唔到網友對我嘅表現都會有咁大回響，真係好開心！」對於節目可以成功添食，芷珊坦言有壓力：「因為要keep住個口碑，希望觀眾會滿意！（考慮籌備《最佳男、女歌手？）都好！希望可以繼續製作多啲好睇嘅節目！」
文：專案組