丘凱敏法國開工無暇濕平
靚女主持丘凱敏（Anna）早前與星級形象顧問郭慶彬（Rick）遠赴法國巴黎，為nowTV拍攝節目《女皇駕到Vogue in Paris》，本想寓工作於Shopping的Anna笑言：「我本來諗住去法國Shopping大出血，仲帶齊老公啲卡過去碌，點知到頭來我淨係可以買到一個手袋！」
Anna解釋全因塞車累事：「正值時裝周嘅法國交通真係好繁忙，原本15分鐘嘅車程，結果要花成一個鐘！而且我哋今次嘅行程好緊密！我朝朝早七點鐘就起身化妝set頭，日日都要睇兩、三場時裝騷，一有空檔時間仲要去香水廠、酒廠參觀，唔好話無時間shopping，連食飯嘅時間都無，仲試過一日淨係食一餐！」