盧凱彤成日飛 唔玩異地戀
盧凱彤（Ellen）曾因被爆與同性友人過從甚密，更共建愛巢而惹來狗仔隊埋身，強調對方只是「室友」的她指入行以來只有一次被記者跟的經驗，更憶述：「嗰一刻個心怦怦跳，原來自己都有新聞價值！」但經常離港的她卻坦言唔會玩異地戀。
前組合at17成員盧凱彤兩年前與林二汶分道揚鑣後，前者泊到好碼頭，加入大唱片公司，後者則要自掏荷包80萬出新碟。問到Ellen自覺比二汶幸運得多？她說：「佢可以自資出碟係幸運嘅一種，我知佢搵到自己嘅重心，佢一向都係好獨立！」
她說初出道時生活曾朝不保夕，戶口長期糧尾：「以前我會有好多怨氣，怨賣唔到碟、怨冇錢交租，有一兩吓念頭諗過唔撈，但我唔做呢行又做咩呢？」幸好，現時歌手兼結他手的她收入已穩定得多：「做結他手真係好搵過做唱作人好多，尤其係做陳奕迅嘅巡迴騷！」
第一次被跟
她指新國語碟中，《誰》一曲的創作靈感源自於「出櫃」後的黃耀明。眼見宣布「大事」後的明哥飽受壓力，Ellen無名火起說：「明明係一件美好嘅事，點解會被人扭曲成咁！」
而幾乎是異性絕緣體的她入行以來，最轟動是被傳與同性形象指導Cathy同居，Ellen說：「佢只係我Roommate，好記得嗰次係第一次被記者跟，見到樓下有狗仔隊，嗰一刻個心怦怦跳，原來自己都有新聞價值！」問她現階段恨拍拖？她說：「我依家成日唔喺香港，經驗所得我係唔可以玩異地戀。都係等到我有時間、留喺一個地方耐啲先瘋狂地戀愛啦！」
文：音樂組
攝：黎智輝