孫耀威訂婚期 分手即娶
39歲的孫耀威（Eric）新碟高唱《I do》，願意為愛情上刀山落油鑊，但與拍拖5年的陳美詩（Macy）婚期，Eric即採取「拖字訣」，除非被逼到埋身嗌分手，Eric先肯就範：「咁咪娶囉。」
Eric花了十四個月專心炮製新專輯《A SECOND THOUGHT》，他表示大部分時間都是閉關寫歌，但總不能「食穀種」，所以他中途返內地三個月拍了一部劇集。新碟中Eric參與曲詞監唱四部分，即多兼了曲詞監酬勞？Eric笑言：「理論係收多幾份人工，但新碟今次點解會有12首歌？就係因為我將多收嘅人工放番落去張碟度，做多咗兩首歌。」
其中一首是Eric精心炮製的疑似求婚歌《I Do》，Eric則堅稱是首Sweet情歌，因《I Do》除包含教堂入面的含意外，並有一種願意為愛上刀山、落油鑊的義氣仔女愛情。Eric謂：「願唔願意付出係一段感情能唔能夠永久嘅關鍵，當中講緊係妥協、遷就同諒解。（唱《I Do》給Macy聽？）咁又冇，但我知佢好鍾意呢首歌，因為係佢激發起我嘅創作靈感。」
養貓激發父愛
至於「結婚」兩字，Eric坦言：「對我嚟講結婚就為咗生仔，所以一日未到生唔到嘅年紀，都未使結婚住。（Macy可有催婚？）佢最隨緣，冇乜強求。（因住女友唔等你！）佢唔等我，我咪娶佢囉，人就係咁衰。」不過，Eric稱自從養了三頭貓咪後，發覺竟然父愛爆發，在外工作時都會心掛掛家中的愛貓，明顯與以前大細路的性格大有不同，亦令他覺得「結婚生仔」的日子將不遙遠，Eric笑言：「我一定會喺世界末日前做呢件事，但我心目中嘅世界末日冇咁快到。」
文：音樂組
髮型：SunnyYu@Hair Culture
服裝：Ted Baker
場地：Island Seafood