黃宗澤忘形 累Stephy破戒
黃宗澤（Bosco）向鄧麗欣（Stephy）忘形餵食，搞到對方「打爛齋缽」。雖與胡杏兒的戀情告終，Bosco似乎未有留下陰影，不排除再與圈內人墮愛河，果然「愈戰愈勇」﹗
Bosco與Stephy於新片《等•我愛你》內關係由起初的歡喜冤家，變成最終的親密愛人。大銀幕上晒恩愛之餘，鏡頭背後靚女更為拍檔「打破齋缽」，Bosco憶述起來也蠻不好意思﹕「嗰場戲原本係講我同佢去扒房撐枱腳，場務專登放碟素喺Stephy面前，因為知道佢唔食肉，但就唔記得咗劇情其實係交代我餵佢食嘢，我梗係切面前啲肉餵佢啦，因為連戲冇得郁，搞到每個take後Stephy都要即刻嘔番啲肉出嚟，真係辛苦晒。」
先後三次合作，Bosco與Stephy默契漸見成熟，然今次「談情說愛」，二人卻非常的點到即止，就連Bosco也禁不住笑謂：「冇拖冇攬o架，關係大家意會啦。」
做足心理準備
銀幕上與Stephy出雙入對，銀幕下Bosco卻與胡杏兒的戀情告終，早前新聞一下子衝着Bosco而來，現在他氣定神閒的謂：「其實心裏面做足準備工夫嘞，唔開心梗係會，但都OK嘅。（再拍拖？）做吓嘢先啦，冇諗喎。」雖然舊情真人騷般被迫「公告天下」，但Bosco卻依然大無畏：「同圈外或者圈內人拍拖都各有利弊，總之感情事順其自然啦。」
繼續演賀歲片
近月Bosco於影壇密食當三番，先後低調完成了幾部電影，例如與金剛拍檔，拍了部戲匭如當年《咖喱辣椒》般的警匪片，他更首度擔演軍裝警察。而近日他更獲曾志偉「欽點」，於明年賀歲片內繼續擔綱演出。Bosco覺得影、視方面演出的滿足感其實可以說大有分別﹕「拍劇篇幅長少少，不過拍電影嘅自由度相對都大啲。（拍咁多咪豬籠入水？）乜呀？手停口停呀。」
文﹕影視組
髮型﹕Kel@HH IL Colpo
化妝﹕Cyrus Lee
服裝﹕Voulezous