陳嘉桓考牌成功興奮彈起

陳嘉桓十八歲生日時許下的願望是考得車牌，數數手指兩年了，日前終在她二十歲生日前夕成功考牌！曾在考中期路試「肥佬」的Rose吸取經驗，早上十時許現身元朗駕駛學院先與教練「惡補」一輪，最後在正式考試時以超水準的表現順利過關。接過成績單後，她興奮得雀躍跳起，更不慎露出小蠻腰，難怪一班男學員在旁邊（目及）到「流口水」！

最想載家人

從小在元朗區長大的她可謂佔盡「地頭蟲」的優勢：「我好熟呢頭啲路，加上自己由細到大認路都好叻，所以考試時更輕鬆！」她直言最想家人與愛犬成為她的第一位乘客，問到與前男友出街拍拖，多由對方載回家？她說：「好少，自己拍拖經驗又唔多，通常都係朋友車我。」為報答朋友們的接載之恩，她坦言唔介意日後擔當「柴可夫」：「遲啲一班人出街，我可以做柴可夫載番佢哋！」

與母親感情要好的Rose最希望家人成為她的乘客。

未考牌成功前，Rose經常放下偶像包袱，跟人逼巴士。

鍾情粉紅色

一直立志做車主的她打算先攻平價車：「先買一架低成本嘅車代步，等我媽咪都考到牌先買架貴車！」她與很多少女一樣，都是鍾情粉紅色：「我心目中嘅Dream Car係粉紅色，最好係Mini Cooper，我可以加好多圖案喺車身！」剛剛踏入二字頭的Rose還透露生日願望是希望儲夠彈藥，買靚車兼供首期上樓做「90後」業主！

文：音樂組

攝：司徒國榮