JC 真空格鬥無懼再失守
「警鐘胸」Jessica C.（JC）早前發生露「暈」事件後，似乎見過鬼都唔怕黑，在前晚及昨日繼續性感上陣，又谷胸又露腰，還坦言真空示人很安全，之後又爆男友嘲笑她露暈都冇嘢睇。不過她表示鍾情搏擊男，大讚男友Mr.Bond體格健碩！
早前露「暈」的JC前晚與周秀娜男友Avis結伴出席時裝活動酒會，她繼續「胸」降會場，更坦言真空上陣，不過很安全，更自豪說：「我冇push上圍呀！」及後又稱已將露「暈」一事告知男友，雖然男友感到震驚，卻嘲笑她，她說：「佢話都冇嘢睇喎！」Avis全程傍實JC，就連JC也笑他像貼身保鏢，冇人敢埋身！而Avis坦言不想將女友周秀娜掛在口邊，更搞爛gag：「我公司都有Ana R.，都係另一個『Na』姐！」
擔任Octagon girl
而昨日JC出席「UFC®終極格鬥冠軍賽」時化身Octagon girl，身穿小背心配短褲的她谷胸、露腰兼騷腿，坦言鍾情搏擊男，問到男友Mr.Bond是否體格健壯？她說：「都強！佢平時都有打boxing，自己都鍾意睇，有時都會約埋Ana R.同Lisa S.一齊睇。」她坦言該終極格鬥是國際賽事，能夠擔任Octagon girl，男友引以為傲，她稱自己以前都有學泰拳及其他功夫：「我樣樣都識，不過我都想學唔同國家功夫，最想成為邦女郎，我好欣賞導演昆頓塔倫天奴，欣賞佢嘅電影！」此外，「UFC®終極格鬥冠軍賽」定於今個星期六假澳門威尼斯人金光綜藝館舉行。
伍允龍撐嘉欣專業
同場出席的鍾嘉欣緋聞男友伍允龍，表示很喜歡欣賞終極格鬥賽，大讚參賽者有體育精神而不殘忍。問嘉欣可會覺得殘忍？他說：「你問番佢啦！ （陪你睇？）好多朋友陪我睇，安志杰同霆鋒都鍾意睇。」提到有指鍾嘉欣獲老闆何哲圖照顧有加而傳緋聞，他表示不清楚：「唔知咩事，佢哋喺工作上係專業關係，老闆對員工好係啱。（呷醋？）晶哥（王晶）都對我好好！（叫佢小心啲？）佢好醒目，識諗唔使教。」
文：名人組