林峯四登紅館 皮氣爆發
闊別年半，「Chok王」林峯即將再次踏足紅館，日前他披上黑皮背心大騷肌肉，更擺出多個誘人煞食甫士宣傳個唱。林峯如此搏命力谷，相信屆時必定「峯芒畢露」，Chok爆紅館！
「Chok王」林峯將於明年1月底於紅館舉行《A Time 4 You林峯演唱會2013》，是次個唱乃林峯出道以來第4個紅館騷，今次的主題命為「A Time 4 You」，意指林峯希望相約粉絲共享精彩的晚上。
早前，林峯就為演唱會拍攝宣傳海報，為營造粗豪硬朗的形象，他穿上黑色皮革背心，大騷肌肉，林峯一埋位就立即「Chok王」上身，駕輕就熟地擺出多個勁Man甫士，大爆fit爆身形，加上結實誘人的老鼠仔，相信這輯宣傳照必定冧暈不少女粉絲！
微電影碌盡友情卡
除了拍攝宣傳海報，林峯最近更碌盡友情卡，邀請各方好友為個唱錄製微電影，包括人氣急升的宅男女神岑麗香、視后大熱的徐子珊等。昨日，林峯就在中環拍攝外景，問到邀好友們客串何價？林峯避重就輕，並識做地說：「其實拍呢套微電影嘅時間好急，反而想多謝咁多位好友百忙中抽空幫忙！」
不過，所謂人紅是非多，談到有報道指林峯與曾傳緋聞的葉璇早前到橫店公幹期間，二人忽然失蹤近兩小時，林峯坦言：「哈！真係好好笑，我點知佢去咗邊。我一次同佢單獨食飯都冇，況且我一直當佢係『兄弟』咋。」似急欲撇清關係，專心準備個唱。
文：音樂組