金剛：衰o左最多咪走
金剛來香港發展有人說他失意台灣，的確他真的曾在寶島過着窮到褲穿窿的日子，不只戶口得一蚊台幣，更幾乎一念之差做了社團嘍囉。但金剛離台赴港並非冇得撈，而是希望在最忙碌最風光之時，食住條水繼續上。
有人話金剛係失意台灣先嚟香港搵食，咁講係咪冇溫過書呢？我決定嚟香港嘅時候，係我台灣最多工作嘅時候喎，一個月20個通告，多Job到自己都幾乎接唔晒。嗰時樂小姐（樂易玲）嚟台灣，同我講話香港TVBS有個節目想搵我做，畀兩星期我諗吓，哎呀！人生交叉點呀！當時我真係唔怕冇錢搵，但係呢個係一個好機會喎，係男人都唔想一世安於現狀，思前想浩（後），博一鋪都巧（好），衰咗最多咪敗走香港。
曾經 窮剩「益」蚊
講真，我事業運並非一帆風順，試過窮到冇朋友，幾個月冇工作，日日喺屋企對住四面牆，戶口有幾多講你都唔送（信），得益（一）蚊雞，嘩！即係得港紙兩毫半，問你死未？因為要租屋，所以咪問朋友借錢囉！當時灰到自己都唔想見到自己，冇錢到頭髮都長埋，有時同啲社團朋友一齊，佢哋問我加唔加入，當時年紀小，真係有啲心郁，但霎時間淆底，都係唔巧（好）喇，返唔到轉頭，咁就一世喇！
走紅 早過「Ｆ屍」
不過呢，人係唔會衰足益（一）世嘅，機緣巧合下有機會拍劇，第益（一）部劇犀利喇，拍青春校園劇《麻辣鮮師》，第一代係言曾輸（言承旭）同Ju孝Ten（朱孝天），第二代就係潘會柏（潘瑋柏），我就係第三代啦，幾威呀！嗰時仲未有F屍(F4)，咁多集最紅係我啦，真係o架！依家台灣仲日日滾筒式播放。
口述：金剛
筆錄：專案組