林峯睇feedback視帝冇走雞
【李惠儀深圳直擊】無綫小生林峯被視為今屆視帝大熱門，昨日他在深圳出席活動時，就吸引大批粉絲一早到場舉牌支持，聲勢浩大！難怪林峯對奪得今屆視帝充滿信心，還講到明恨攞獎！
林峯昨日出席《依波路表皇室系列新品深圳盛大發布會》，活動現場早已聚集逾千粉絲，在通道兩旁擠得水洩不通，當林峯甫出現，粉絲們即時失控尖叫，尖叫聲此起彼落，場面墟冚；林峯由多名保安沿途護送，有粉絲更試圖伸長手想跟偶像作近距離接觸，林峯對粉絲們的熱情，均大為受落，不停揮手相向。
出席大結局活動
身為品牌代言人的他坦言未試過與伴侶戴情侶錶，因為仍未找到要送情侶錶的對象，反而曾送給媽媽和妹妹。此外，提到其主演的劇集《雷霆掃毒》昨晚大結局，他笑說：「其實我今晚（昨晚）會去大結局活動，但我呃三哥話去唔到，連監製都唔知我會去。（對收視有冇信心？）其實睇網上feedback已經知，好多謝大家支持，依家好多人叫我角色名。」
想同子珊一齊攞
對於劇集受歡迎，林峯坦言有信心奪得今屆視帝：「我都入圍好多年，由廿幾歲已經入圍。（今年有劉松仁呢個勁敵？）勁敵年年都有好多，好希望自己有份，依家一年拍一套劇，好希望憑呢個角色（Happy Sir）得到，套劇好認真製作。（想同子珊一齊拎視帝視后？）都想，子珊初初聽個古仔，會諗做毒后會唔會好大回響？效果會點？我就同佢講，我諗唔到有人比你更適合。」談及年底樂壇頒獎禮，他就說：「係咪普選？都有信心，普選會令觀眾同歌迷有更多互動，更加投入。」