雨僑唔敢向老細黑面
歌手雨僑昨日以肉色透視短裙兼四吋高高踭鞋出席個人簽唱會，談到有指她因為老闆蕭定一指摘其緋聞男友羅力威為二打六而向老闆黑面，心情大靚的她表示：「冇黑面呀，可能咁啱畀人影到我冇表情啫，而且自己仲有六年約，加上阿一出糧畀我，點敢黑面呀！」問到老闆棒打鴛鴦可有影響心情？她坦言：「我哋冇聯絡啦，一直都係好朋友咋。」
此外，區文詩現身送上紅色內褲給雨僑，問她點解唔送T-back？她說：「呢個穩陣嘛。」問到早前有報道拍到她與吳雨霏夜蒲時，Kary遭老外出手亂摷一事，她笑說：「我自己就真係摷自己喇，因為件打底衫成日移位。」