文詠珊走出鬱症要殺人

黎明愛將文詠珊被喻為「第一代o靚模」，14歲時以甜美日本風格出道，一炮而紅，深得宅男愛戴。現已23歲的她，精緻的五官、開朗的笑容依舊沒變，但卻散發出堅強、獨立的女人味。

人們常說穿着品味能反映出一個人的性格，而JM亦由當年可愛的日本娃娃，轉變為中性打扮的型女。「日本風係每個少女必經嘅階段，以前好有心機，每日都扮到靚靚先出街。但係依家做藝人耐咗，覺得每日返工都要化行妝，放假反而想輕鬆啲。」隨着年紀增長，穿着品味亦隨之而改變。現在的她，平日最愛白色Tee襯西裝褸，及配上短短的熱褲。別以為她已放棄打扮，其實她只是改用低調的方式來表現自己，即使是妝容、髮型，仍然一絲不苟。「我近期鍾意化裸妝，最重要就係畫條粗少少嘅一字眉，望落去會好有神、又好有氣質。同埋頭髮都會選擇染深色啲嘅顏色，再紮條馬尾出街就最乾淨利落啦！」

JM曾醉心於可愛的日本娃娃打扮。

JM笑言打扮為滿足自己。

只為自己打扮

人們常說「女為悅己者容」，JM卻大唱反調，強調打扮只為滿足自己。「其實即使我素顏畀人影到，我都完全唔會介意。做呢一行最緊要有自信，要欣賞自己最真實嘅一面。」她亦不忘自嘲：「喺我14歲嗰陣，又肥、又包包面、又未箍牙，都唔知點解會畀『星爸』（星探）發掘。其實佢見咗我幾次，每次都喺唔同地方，但係佢第三次先派卡片畀我。我都有反問佢點解睇中我，但係佢都只係話係睇感覺，佢可以話係我入行嘅第一個貴人，真係好多謝佢賞識我！」

JM視助手阿霖（左）如家人。	在《大追捕》中，JM要被王敏德毒打。	JM與舊愛李冠峰即使分手，二人仍出雙入對。
為演活角色，JM險些患上抑鬱症。

終日以淚洗面

現在，JM已從模界跳到影圈，並從中得到無限刺激感及快感。非常投入於每個角色的她，坦言電影豐富了她的人生，但同時亦令她走入人生的黑暗時代。「大半年前，喺我拍《大追捕》嗰陣，為咗投入角色，令我長期都處於好抑鬱嘅狀態。有一場戲講我畀王敏德毒打，我要嚇到嚎哭，所以我一有時間就聽啲好傷感嘅歌，夜晚就喺屋企練喊，由開頭眼紅，到一滴滴眼淚流出嚟。」終日以淚洗面的她，坦言險些患上抑鬱症，幸好拍攝工作及時完成，及後又與工作人員到日本旅遊兼慶功，才令她走出陰霾，簡直險過剃頭！

患疤痕增生症

但她明顯「見過鬼都唔怕黑」，反而愈演愈上癮，下一個目標更是做殺手！「我次次都畀人打，真係好想試吓打人！」雖然她以輕鬆的語調說出此話，但患有「疤痕增生」症的她，實際上要冒着留下永久疤痕的風險，來面對每場危機四伏的動作場面。「雖然留低咗疤痕，會對我做模特兒有好大影響，不過我會好小心保護自己，所以應該OK嘅！」雖然她暫時並未開始學功夫，但正在學習較溫和的跳舞及瑜伽，打好運動底子及拉鬆筋骨，以應付不同動作場面的需要。假若將來有做打女的機會，她定必全情投入，不顧一切地打個痛快。

助手＝好友

作為藝人，JM不時要到處飛，要時常面對不同的人和事。她坦言自己的助手阿霖是陪伴她最多的人，二人的感情更早已昇華到如家人一般。「佢已經唔係我助手，而係我嘅好朋友。」他除了妥善地安排JM的工作，亦會為JM分擔喜與悲。JM笑言：「好記得上次拍我畀人打嗰場戲，佢真係好肉緊、好心痛我，好似佢自己都畀人打咁！」阿霖亦尷尬地表示：「嗰陣成個氣氛好恐怖，全場都唔出聲，佢又喊喎！搞到我好唔開心！不過佢好叻、好堅強，拍完都笑住同我講頂得住，真係令我好感動。」

堅稱冇翻撻

JM與舊愛李冠峰分手後，早前被拍得同車出入，經常出雙入對的二人盛傳翻撻。JM堅持二人只屬朋友關係，並強調目前並無追求者，感情方面順其自然。對於狗仔隊日以繼夜的追訪，她既無奈，又氣憤地表示：「其實我可以點？雖然我話做呢行要『食得鹹魚抵得渴』，但唔代表我嘅私生活都要老馮畀人知！加上咁樣實在係對另一半太唔公平，其實藝人都係人，都需要普通生活，都要保護自己。」看來她堅持不承認二人翻撻，很有可能是她保護愛苗的方法之一。

採訪：龔凱欣

攝影：劉智源

服裝：SHEL'TTER