千嬅嫁得好畀105分
霍英東長孫霍啟剛與中國跳水公主郭晶晶將於11月10及11日，分別在南沙和香港兩地舉行盛大婚禮，「剛晶」的婚禮由請帖、婚禮場地、布置以及婚紗禮服，均是頂級中之頂級，將會是香港的世紀婚禮。其實每個女孩子，在出嫁當日，都希望自己的婚禮最完美、難忘。所以已婚的楊千嬅、諸葛紫岐和混血名模Jocelyn，都力撐自己的婚禮才是最世紀的婚禮，給她們帶來溫馨幸福。千嬅更讚老公搞得婚禮好好，畀105分。
楊千嬅
最難忘梗係自己嗰個婚禮，第一，自己真係嫁得出，第二，老公做得好好，畀105分，完全發揮佢做公關的才能。唯一美中不足，係夜晚九點九先開席，畀長輩話太夜。
岑麗香
世紀婚禮？我鍾意去一個好遠嘅地方結婚，因為旅行結婚比較relax，又可以見到好closed嘅朋友，咁先係我難忘嘅世紀婚禮。
Jessica C.
喺我12、13歲時，參加我哥哥嘅婚禮，嗰時我感動到喊，仲成日希望自己有朝一日都可以好似佢咁，咁幸福、快樂。
諸葛紫岐
自己嗰個婚禮最難忘，因為我有份設計，亦係我細個嘅夢想，當晚有成萬個麵包超人波波從天而降，好似童話世界咁，好開心。
李彩華
我最難忘去好朋友嘅婚禮，我有上台獻唱一曲，點知唱咗兩句，我就喪喊，佢上台攬住我，真係好感動、好開心。
陳嘉容
我會揀我朋友嘅沙灘婚禮，朋友嘅老公係黑人，結婚當日佢只係着咗鬆身嘅短褲，女仔就着得好簡約，真係好開心，大家都好熱情。
Jocelyn
一定係我喺夏威夷舉行嘅婚禮最好，為咗呢個婚禮我足足籌備咗五個月，就連婚紗都特登飛返去夏威夷同媽媽、婆婆一齊揀嘅！係我一生人裏面最難忘嘅一日。
黃心穎
最難忘係姐姐嘅婚禮，因為佢哋去峇里島結婚旅行，總共三十幾人同行。我哋仲一齊去沙灘玩、喺露天地方食buffet，點知突然落雨，大家好狼狽咁搬啲嘢入室內，好彩十幾分鐘後又停咗雨，夜晚仲一齊放煙花添！
張名雅
喺我3、4歲時，阿姨結婚我做花女，雖然嗰陣好細個，都唔知發生咩事，不過記得阿姨要旗袍、擔紅遮，我就着住婚紗裙仔，扮到靚靚咁！