林子善一腳踢 老闆照通渠
梁靖琪（Toby）雖然比林子善後生，但因二人交情之好，不介意給對方稱為「家姐」。Toby亦十分為得人，眼見「細佬」開冰室做老闆，即義不容辭幫手召集，順道以身教傳授生意經。子善亦明白力不到不為財，雖身為老闆，但乜都做，連通渠亦由自己落手，而眼見「家姐」幫忙自己甚多，他亦識做表示：「呢個人情係我欠你，一定會還！」
梁：梁靖琪
林：林子善
老婆人辦從未敢追求
梁：細佬，我細細個就睇你演《喜劇之王》，嗰隻性格我好入腦，之後07年我哋合作《兩妻時代》，10年再演《花花世界花家姐》時就最熟！
林：但我識你嘅時候係玩遊戲節目《獎門人》，嘩……你用大波撞人，有無限能量！不過，「家姐」剛出道時係做歌手，我有睇你個組合「女生宿舍」，見海報就知道有呢個人，到玩遊戲節目，就覺得你好爽，我份人性格冇中間，交朋友一係鍾意一係唔鍾意，而當時你嘅性格，係我夢寐以求嘅老婆人辦，好賢淑……點知做做吓就做咗我「家姐」！但喺我心目中又從來冇諗過追求喎，當我知你係高層梁家樹個女……又加上我都有女朋友啦！
梁：子善其實你大我好多（年齡）！
林：人哋又唔知，其實你有好多嘢又大我好多啫！唔係……其實叫「家姐」係一種尊重，因為你好關心我好照顧我，成日都擔心我捱壞身體！
梁：「細佬」份人好可愛，又勤力，我哋拍《花家姐》時你為咗賺錢，日頭拍戲通宵打碟，之後返廠瞓吓又開工，我都好擔心你捱唔捱到！
林：不過，「家姐」你幫我好多，好似我開冰室，我講一句，你即刻話嚟！仲問我有冇通知記者、有冇藝人做嘉賓，我完全唔識，你即刻幫我搞晒！當我欠你啦！我會還o架！
梁：還我一年喺度食嘢唔使畀錢！
經營生意要用心食腦
林：喺呢行我有兩個最好嘅朋友，一個係嘉穎（鄭嘉穎），另一個係Toby！
梁：我幫你開幕啫！細佬，做生意要親力親為，睇緊啲！
林：所以我乜都做，唔好講樓面，我連通渠都做，我一星期七日都睇檔，我當伙記係拍檔，家姐都係做生意，佢畀咗「身教」我，乜都落手落腳做，我對冰室嘅寄望，係所有客人食完嘢，好健康、好開心咁返工，如果返工受氣，又可以落嚟食嘢，搵我傾吓、發洩吓都得，食物嘅感情不止來自食，而係人與人之間嘅溝通！
梁：做生意講頭腦同心機，我日日九點就返公司，唔係話擺款，而係畀大家知道我係有心，「細佬」你好似我，從冇遲到！依家見你生意上軌道都好安樂，冰室亦有好幾道招牌菜……
林：我哋餐廳出名係炒蛋，我拍檔有幾個酒店師傅朋友，後來佢哋研究咗點炒，再綜合咗意見，最後用咗我拍檔嗰條方，之後就傳授畀師傅，另外仲有瑞士汁雞翼！最近我仲有設計一款冰鎮鮑魚，面頭有素翅，我支持環保，所以用素翅，客人都食得舒服。
文：影視組
攝：黃叔榮
場地：龍鳳冰室